Rhybudd ynghylch twyllwyr sy'n esgus bod yn swyddogion o'r banc neu'r heddlu er mwyn twyllo dioddefwyr i roi symiau mawr o arian iddynt

Dros y diwrnodau diwethaf, rydym wedi cael adroddiadau am bobl yn cael eu targedu gan dwyllwyr sy'n honni eu bod o fanc y dioddefwr, o'r heddlu, neu o sefydliad swyddogol arall. ??

Fel rhan o'r sgamiau hyn, mae troseddwyr yn ceisio perswadio pobl i godi arian o'u banc, gan ddweud o bosibl fod y cyfrif wedi bod yn destun twyll. Wedyn, bydd y twyllwr yn trefnu i gludwr gasglu arian parod, cardiau banc, neu'r ddau, o gartref y dioddefwr.

Mae'r twyllwyr sy'n cyflawni'r sgamiau hyn yn argyhoeddiadol iawn yn aml, ac yn adrodd straeon a all swnio'n gredadwy. Weithiau, byddant yn dweud eu bod yn cynnal ymchwiliad cudd ac na ddylech sôn wrth unrhyw un arall am yr alwad. Mae'n bosibl hefyd y byddant yn dweud bod eich cyfrif mewn perygl os na fyddwch yn gweithredu'n gyflym.

Os byddant yn llwyddo i'ch argyhoeddi, byddant yn eich cyfarwyddo i wneud rhywbeth sy'n golygu eich bod yn rhoi eich arian iddynt. Er enghraifft, efallai y byddant yn gofyn i chi godi arian (neu arian tramor) er mwyn i'r cludwr ei gasglu fel tystiolaeth. Gallant hefyd ofyn am fanylion, fel eich PIN, dros y ffôn cyn i gludwr gasglu eich cardiau credyd neu gardiau banc.

Rydym yn parhau i gael adroddiadau am y sgam hon yn Ne Cymru. Felly, os oes gennych berthnasau hyn nad ydynt yn defnyddio'r cyfryngau cymdeithasol, cofiwch siarad â nhw am hyn. Helpwch nhw i fod yn wyliadwrus mewn perthynas â'u harian, a chofiwch eu hatgoffa na fydd y banc na'r heddlu byth yn ffonio i ofyn iddynt gadarnhau manylion personol neu fanylion banc, nac yn gofyn am eu PIN. Ni fydd y naill sefydliad na'r llall yn anfon cludwr i gasglu arian parod neu gardiau 'chwaith. 

Ein cyngor:

• Ni fydd eich banc na'r heddlu byth yn ffonio i ofyn i chi gadarnhau eich manylion personol na'ch PIN. Os cewch chi alwad yn gofyn i chi wneud hyn, rhowch y ffôn i lawr, arhoswch ychydig funudau a ffoniwch eich banc ar rif rydych chi'n gwybod sy'n ddilys, fel yr un ar gefn eich cerdyn
• Ni fydd eich banc na'r heddlu byth yn anfon cludwyr i'ch cartref i gasglu'ch arian parod, cardiau banc, rhifau PIN nac unrhyw nwyddau gwerthfawr eraill. Mae unrhyw geisiadau i wneud hynny yn rhan o sgam
• Ni fydd yr heddlu yn cysylltu â chi yn ddirybudd ac yn gofyn i chi gymryd rhan mewn ymchwiliad sy’n gofyn i chi dynnu arian o’ch banc, neu brynu nwyddau gwerth uchel, fel gemwaith neu aur