Gwaharddiad pêl-droed i ddyn o Swydd Gaerloyw a daflodd alcohol mewn tafarn yng Nghaerdydd

Mae dyn o Swydd Gaerloyw wedi cael gorchymyn gwahardd pêl-droed sy'n ei atal rhag mynd i unrhyw gêm bêl-droed yn y DU am dair blynedd.

Roedd Mackenzie Bailey, 18 oed o Yate, ymysg y dorf o gefnogwyr Dinas Bryste a ddaeth i ganol dinas Caerdydd cyn gêm bêl-droed yn erbyn Dinas Caerdydd ddydd Sadwrn 15 Chwefror.

Cafodd ei weld gan swyddogion yn taflu can o alcohol yn Nhafarn O'Neils ar Wood Street.

Llwyddodd swyddogion i'w adnabod yn y dorf o gefnogwyr yn ardal 'oddi cartref' Stadiwm Dinas Caerdydd a chafodd ei arestio am Adran 4 Trefn Gyhoeddus.

Mae'r gorchymyn gwahardd yn atal Bailey rhag mynd i unrhyw safle at ddiben mynychu unrhyw gêm bêl-droed yn y Deyrnas Unedig.

Pan fydd gemau pêl-droed yn cael eu chwarae y tu allan i’r Deyrnas Unedig, bydd yn rhaid iddo roi gwybod i orsaf heddlu benodol ac ildio ei basbort.

Dywedodd PC Simon Chivers o Heddlu De Cymru: “Pan fydd tystiolaeth o anrhefn sy'n gysylltiedig â phêl-droed, byddwn bob amser yn ceisio dod o hyd i'r rhai sy'n gyfrifol er mwyn sicrhau y caiff camau priodol eu cymryd.

"Mae'r mwyafrif helaeth o gefnogwyr pêl-droed yn ymddwyn yn barchus – unigolion fel hyn sy'n rhoi enw drwg i gefnogwyr pêl-droed a'u clybiau. Nid oes lle i ymddygiad o'r fath ac ni chaiff ei oddef."

Yn ychwanegol at y gorchymyn gwahardd, rhoddwyd dirwy o £500 i Bailey a chafodd ei orchymyn i dalu cost o £85 a gordal o £200.