Dyn wedi'i arestio yn dilyn achos o saethu yn Nhonysguboriau

Mae dyn wedi cael ei arestio ar amheuaeth o lofruddiaeth yn dilyn saethiad angheuol yn Nhonysguboriau.

Cafodd Heddlu De Cymru alwad neithiwr, nos Sul 9 Mawrth, am 6.10pm yn nodi achos o saethu yn ardal Green Park, Tonysguboriau.

Roedd swyddogion a pharafeddygon Gwasanaeth Ambiwlans Cymru yn bresennol yn y lleoliad.

Daethpwyd o hyd i fenyw 40 oed yn dioddef o anafiadau difrifol. Ac er gwaethaf ymdrechion y gwasanaethau brys, cafodd ei datgan yn farw yn y fan a lle.

Mae dyn 42 oed o Donysguboriau wedi cael ei arestio ar amheuaeth o lofruddiaeth, ac mae yn nalfa'r heddlu ar hyn o bryd.

Mae nifer o safleoedd troseddau wedi cael eu gosod yn yr ardal ac mae ffyrdd yn parhau ar gau wrth i waith fynd rhagddo i gasglu tystiolaeth yn dilyn y saethu ac mae ymholiadau i'r amgylchiadau yn parhau.

Dywedodd y Ditectif Brif Arolygydd James Morris:

“Rwy'n deall y pryder y bydd hyn yn ei achosi yn y gymuned leol, a hoffwn roi sicrwydd i bobl bod tîm o dditectifs profiadol eisoes yn gweithio'n gyflym i greu darlun o'r digwyddiadau neithiwr.”