Carchar i ddelwyr cyffuriau o Gaerdydd a gamfanteisiodd ar fechgyn ifanc agored i niwed i werthu cyffuriau ar eu rhan

 

Dynion o Gaerdydd wedi cael eu carcharu am droseddau cyffuriau a chaethwasiaeth fodern.

Camfanteisiodd y delwyr cyffuriau Cameron Farrah, 25 oed, a Tyrese Jones, 23 oed, o Drelái, ar fechgyn ifanc agored i niwed i werthu cyffuriau ar eu rhan er mwyn gwneud mwy o elw.

Byddai'r dioddefwyr yn treulio'r rhan fwyaf o'u diwrnodau a'u nosweithiau mewn ardaloedd coediog diarffordd, mewn pebyll dros dro yn gwerthu crac cocên a heroin.

Cafodd Farrah a Jones eu harestio fel rhan o ymgyrch plismona rhagweithiol ar gyfer llinell cyffuriau “CC” a oedd yn gweithredu ledled Caerdydd a Bro Morgannwg.

Cafodd tri unigolyn arall – Chakeel Lovell, 23 oed, o Benylan, Joshua Dunbar, 28 oed, o Bentyrch, a Taylor Penny Soraya Williams, 25 oed, o Drelái – hefyd eu harestio am eu rolau yn y llinell cyffuriau.

 

Roedd llinell cyffuriau CC yn llinell cyffuriau sefydledig a phrysur a oedd wedi bod yn gweithredu ers sawl blwyddyn yn ardal Caerdydd.

Datgelodd ymchwiliad yr heddlu yr amodau erchyll y gorfodwyd y pedwar dioddefwr i weithio ynddynt rhwng mis Tachwedd 2023 a mis Ionawr 2024.

Dywedodd y Ditectif Arolygydd Tim Jones, yr Uwch-swyddog Ymchwilio:

“Roedd y dioddefwyr yn eistedd ar hen ddodrefn wedi'u taflu mewn lleoliadau coediog oddi wrth y cyhoedd, dros nos, mewn pebyll dros dro, wedi'u hamgylchynu â machetes, cyllyll, ac nid oeddent yn cael llawer o dâl am eu hamser yn gwerthu'r cyffuriau peryglus hyn.
“Mae camfanteisio ar blant sy'n agored i niwed fel hyn yn ffiaidd.Nid oes lle i ecsbloetiaeth na chaethwasiaeth yn ein cymunedau yn Ne Cymru, a byddwn yn gwneud popeth o fewn ein gallu i arestio'r rhai dan sylw.”

Hwn yw'r achos cyntaf o'i fath yng Nghaerdydd lle mae llinell cyffuriau wedi cael ei erlyn am droseddau caethwasiaeth fodern ynghyd â chyhuddiadau o fasnachu mewn cyffuriau heb fod angen i unrhyw ddioddefwyr roi tystiolaeth i gefnogi'r erlyniad.

Cafodd Dunbar, Farrah a Lovell eu harestio yn Highbury Road, Trelái, Caerdydd, ar 13 Mawrth, 2024.

Yn ystod yr arestiadau, cafodd 2kg o heroin ei atafaelu.

Cafodd Jones ei arestio bythefnos yn ddiweddarach yng nghyfeiriad ei gartref. Cafodd Williams ei arestio ar 18 Ebrill, 2024.

Ymddangosodd y pump gerbron Llys y Goron Casnewydd ddydd Mercher, 19 Mawrth, ac fe'u dedfrydwyd fel a ganlyn.

• Plediodd Cameron Farrah, 25 oed, yn euog i ddau achos o gynllwynio i gyflenwi cyffuriau Dosbarth A, bod â chyffuriau Dosbarth A yn ei feddiant gyda'r bwriad o'u cyflenwi, a dau achos o fasnachu plentyn. Dedfrydwyd i: 8 mlynedd a 9 mis.
• Plediodd Tyrese Jones, 23 oed, yn euog i ddau achos o gynllwynio i gyflenwi cyffuriau Dosbarth A, bod â chyffuriau Dosbarth A yn ei feddiant gyda'r bwriad o'u cyflenwi, a masnachu plentyn. Dedfrydwyd i: 8 mlynedd a 9 mis.
• Plediodd Chakeel Lovell, 23 oed, yn euog i ddau achos o gynllwynio i gyflenwi cyffuriau Dosbarth A a bod â chyffuriau Dosbarth A yn ei feddiant gyda'r bwriad o'u cyflenwi. Dedfrydwyd i: 6 mlynedd a 4 mis.
• Plediodd Joshua Dunbar, 28 oed, yn euog i guddio eiddo troseddol, sef gwerth £104,000 o arian parod a chryptoarian. Dedfrydwyd i: 25 mis.
• Plediodd Taylor Williams, 25 oed, yn euog i gymryd rhan mewn gweithgareddau grŵp troseddau cyfundrefnol. Dedfrydwyd i: dedfryd o 10 mis o garchar, wedi'i gohirio am 18 mis, gyda 120 awr o waith di-dâl a gorchymyn adsefydlu.

Ychwanegodd y Ditectif Arolygydd Jones:

“Mae Heddlu De Cymru yn ymrwymedig i nodi a diogelu unrhyw bobl ifanc neu bobl sy'n agored i niwed yn y gymuned y mae Grwpiau Troseddau Cyfundrefnol yn camfanteisio arnynt fel y grŵp hwn. Byddwn yn mynd ati i osod gorchmynion megis Gorchmynion Atal Caethwasiaeth a Masnachu wrth gollfarnu unrhyw droseddwyr sy'n ymwneud â'r math hwn o droseddau.”