Carchar i bedoffilydd a oedd yn gweithio mewn ffair a wnaeth feithrin perthynas amhriodol â'i ddioddefwyr yr oedd wedi cwrdd â nhw yn ei waith

Gwnaeth pedoffilydd a oedd yn gweithio mewn ffair boblogaidd feithrin perthynas amhriodol â merched mor ifanc ag 11 oed, gan brynu bwyd, alcohol, sigaréts a theganau meddal iddynt.

Roedd Carl Lintern, 42 oed, yn gweithio ym Mharc Pleser Ynys y Barri yn ystod haf 2023.

Daeth i sylw Heddlu De Cymru gyntaf ar ôl i rieni un o'i ddioddefwyr ei gwestiynu wyneb yn wyneb yn ei waith.

Gan ddweud nad oedd yn malio dim ar ôl ei gyhuddo, tynnodd lun o Carl Lintern a'i gyflwyno i un o swyddogion yr heddlu.

Lansiodd Tîm Camfanteisio'n Rhywiol ar Blant Heddlu De Cymru ymchwiliad a daeth i wybod sut roedd Lintern yn meithrin perthynas amhriodol â'i ddioddefwyr drwy brynu sigaréts a rhoi talebau i'r ffair a theganau meddal iddynt, cyn camfanteisio'n rhywiol ar y dioddefwyr.

Cafodd ei arestio yn y ffair ac yn fuan wedi hynny, daeth swyddogion o hyd i dystiolaeth o achosion eraill o gam-drin dioddefwyr eraill.

O ganlyniad i'r ymchwiliad, daeth Heddlu De Cymru o hyd i nifer o ddioddefwyr eraill yr oedd Lintern wedi camfanteisio arnynt drwy fod yn gyfaill â nhw ar y cyfryngau cymdeithasol, anfon lluniau anweddus ohono ei hun atynt a'u stelcio wrth iddynt fyw eu bywydau o ddydd i ddydd.

Roedd yn aml yn meithrin perthynas amhriodol â'i ddioddefwyr yn y ffair lle roedd yn gweithio gan brynu nifer o anrhegion a rhoi sylw iddynt. Byddai'n bod yn gyfaill â nhw ar Snapchat ac yn eu blacmelio i anfon lluniau anweddus ato. Wrth i'r dioddefwyr ofyn iddo beidio â chysylltu, byddai'n bygwth rhannu lluniau o natur bersonol ohonynt fel ffordd o ddangos rheolaeth barhaus.

Wrth gael ei gwestiynu am yr achosion o gam-drin, gwadodd iddo fod mewn cyswllt rhywiol â'r dioddefwyr. Roedd yn honni iddo ddod yn ddyn poblogaidd yn y ffair a'i fod yn ‘ceisio helpu'r merched’.

Cafodd Carl Lintern, o Barrasford Road, Cramlington, Northumberland, ei gyhuddo o nifer o droseddau ac aeth ymlaen i bledio'n euog i ddau achos o fod â lluniau anweddus o blant yn ei feddiant a bygwth rhannu llun neu ffilm o natur bersonol o berson.

Plediodd yn ddieuog i gymryd rhan mewn gweithgarwch rhywiol ym mhresenoldeb plentyn dan 13 oed, a dau achos o ymosodiad rhywiol ar fenyw, ond cafodd ei ganfod yn euog yn dilyn treial.

Ar 10 Mawrth, cafodd ei ddedfrydu i dair blynedd ac wyth mis yn Llys y Goron Caerdydd.

Dywedodd y Ditectif Gwnstabl Robyn Allen, o Dîm Camfanteisio'n Rhywiol ar Blant Heddlu De Cymru:

“Defnyddiodd Carl Lintern ei swydd yn y ffair fel ffordd o gwrdd â'i ddioddefwyr a oedd yn agored i niwed a meithrin perthynas amhriodol â nhw. Byddai'n eu gorfodi ac yn eu rheoli er mwyn dal gafael ar eu bywydau ac roedd hyn yn gwneud iddynt deimlo'n ddiamddiffyn.

“Nid oes gan ei ymddygiad troseddol na'i ymdeimlad dinistriol o realiti le mewn cymdeithas. Rwy'n gobeithio y gall y dioddefwyr a'u teuluoedd gael rhywfaint o gysur o wybod ei fod bellach yn y carchar lle nad yw'n fygythiad i eraill mwyach. Dylai'r ddedfryd heddiw fod yn rhybudd i eraill sydd naill ai'n ymwneud â throseddau o'r natur hon neu yn eu hystyried.”

Mae Tîm Camfanteisio'n Rhywiol ar Blant Heddlu De Cymru yn dîm ymroddedig sy'n cynnwys swyddogion arbenigol sy'n canolbwyntio ar erlyn y rhai sy'n camfanteisio'n rhywiol ar eraill.