Canfod lleidr a oedd yn defnyddio cyllell i fygwth yn cuddio mewn atig gerllaw

Cafodd lleidr o Gaerdydd a oedd yn defnyddio cyllell i fygwth ei arestio o fewn dwy awr i ddwyn o'i archfarchnad leol.

Diolch i ddewrder cwsmer a recordiodd y digwyddiad cyfan ar ei ffôn, llwyddodd y swyddogion i adnabod yr unigolyn dan amheuaeth yn syth ac roeddent yn gwybod lle roedd yn byw.

Daethant o hyd iddo yn cuddio mewn atig – ychydig funudau ar droed o'r siop Lidl yr oedd newydd ddwyn ohoni – gyda rhywfaint o'r arian parod y gwnaeth ei ddwyn a 1.6g o grac cocên, yr oedd swyddogion yn amau ei fod wedi'i brynu gyda'r arian parod hwn, yn ei feddiant o hyd.

Aeth Leon Carpin, 34 oed o Bontprennau, i mewn i siop Lidl ar Caxton Place, Pentwyn, amser cinio ddydd Sadwrn 9 Tachwedd, gyda rhan o'i wyneb wedi'i orchuddio gyda sgarff.

Roedd y staff yn ei wylio'n agos wrth iddo ymddwyn yn eratig yn y siop, a oedd yn llawn cwsmeriaid.

Funudau'n ddiweddarach, sibrydodd ‘agora'r til’ yng nghlust un o weithiwr y siop wrth ddal cyllell.

Gwyliwch y clip hwn isod, wrth i gwsmer dewr a doeth a oedd yn sefyll ychydig lathenni yn unig i ffwrdd ddechrau recordio ei symudiadau.

Byddwch yn gweld bod Carpin yn gofyn i gynorthwyydd y ddesg talu, fwy nag unwaith, i agor y til. Mae'n cael ei rybuddio bod yr heddlu ar ei ffordd, gan fynd ati i bwyso botymau'n wyllt er mwyn agor y til ei hun.

Yn y diwedd, agorwyd y til iddo a llwyddodd y lleidr i ffoi gyda tua £250.

Cafodd ei arestiad mewn atig tŷ gerllaw ei ddal gan gamera heddlu a wisgir ar y corff.

Cafodd Leon Carpin, 34 oed o Glos y Ffynnon, Caerdydd, ei gyhuddo o ladrata, bod â chyllell yn ei feddiant mewn man cyhoeddus a bod â chrac cocên yn ei feddiant.

Aeth ymlaen i bledio'n euog i bob cyhuddiad, a chafodd ei garcharu am bum mlynedd a chwe mis yn Llys y Goron Caerdydd ar 28 Chwefror.