Carcharu dyn o Drelái am gyflenwi cyffuriau Dosbarth A

Mae dyn a oedd yn esgus bod yn feiciwr cyflenwi bwyd er mwyn cyflenwi cyffuriau wedi cael ei garcharu.

Cafodd Saeef Miah, 21 oed o Cymric Close, Trelái, ei ddedfrydu i dair blynedd a naw mis ar 27 Mai ar ôl pledio'n euog i sawl trosedd yn ymwneud â chyflenwi cyffuriau yn Llys y Goron Caerdydd.

Roedd y pledion euog yn dilyn digwyddiad ar 17 Mai 2023 tua 4.40pm lle roedd swyddogion mewn dillad plaen ar batrôl rhagweithiol ar feiciau yn y Rhath. Cododd Miah amheuon y swyddogion wrth iddo feicio'n araf o gwmpas yr ardal chwarae i blant ac yn defnyddio ei ffôn o bryd i'w gilydd, cyn stopio i ateb galwad.

Ar ôl i'r swyddogion fynd ato gan ddweud eu bod yn swyddogion, nodwyd bod Miah wedi gwisgo'n anarferol i'r tywydd braf, gan wisgo cot fawr, balaclafa, a throwsus gwrth-ddŵr. Roedd ganddo hefyd yn cario bag mawr cyflenwi bwyd.

Cododd ymddygiad nerfus Miah amheuon pellach, ac roedd hyn yn sail i'w chwilio.

Ar ôl chwilio'r bag cyflenwi, daeth swyddogion o hyd i fwy na 100 o fagiau selio yn cynnwys powdr gwyn, sylweddau gwyn crisialog, a sylweddau brown crisialog. Daethpwyd hefyd o hyd i 51 o dabledi, a chafodd Miah ei arestio yn dilyn hyn.

Plediodd Miah yn euog i'r canlynol:

• Bod â chyffur rheoledig Dosbarth A yn ei feddiant gyda'r bwriad o'i gyflenwi – Cocên
• Bod â chyffur rheoledig Dosbarth A yn ei feddiant gyda'r bwriad o'i gyflenwi – MDMA
• Bod â chyffur rheoledig Dosbarth B yn ei feddiant gyda'r bwriad o'i gyflenwi – Cetamin
• Ymwneud â chyflenwi cocên

Dywedodd y swyddog ymchwilio, Cwnstabl yr Heddlu Robert Gadd: “Mae gennym batrolau cudd-wybodaeth rhagweithiol ledled De Cymru bob dydd sy'n edrych allan am weithgarwch troseddol fel hyn. Rwy'n falch o weld y ddedfryd hon a roddwyd iddo heddiw, ac yn gobeithio y bydd yn rhoi amser iddo fyfyrio ar ei weithredoedd.”