Ymgyrch Adriatic yn dychwelyd i gadw glan y môr Aberafan yn ddiogel yn 2025

Wrth i'r haf agosau, mae Ymgyrch Adriatic, ein hymgyrch haf flynyddol ar lan y môr i frwydro yn erbyn ymddygiad gwrthgymdeithasol, wedi cael ei hail-lansio ar gyfer 2025.

Yn yr ymgyrch bydd Heddlu De Cymru yn gweithio'n agos ar y cyd â Chyngor Castell-nedd Port Talbot, Castell-nedd Port Talbot Mwy Diogel, Sefydliad Cenedlaethol Brenhinol y Badau Achub (RNLI) ac asiantaethau eraill er mwyn gwneud glan y môr yn lle pleserus y gall pawb ei fwynhau.

Ar adegau drwy gydol yr haf, bydd gorchymyn gwasgaru Adran 35 yn cael ei awdurdodi ar y traeth, sy'n golygu y bydd pobl sy'n rhan o ymddygiad gwrthgymdeithasol yn gorfod gadael yr ardal.

Yr ardal ddynodedig i'w gadael yw: Y Traeth cyfan gan gynnwys Y 'Traeth Bychan', Pier y Gogledd, ac ardal y promenâd i gyd gan gynnwys busnesau ar hyd y promenâd fel Remo's a Franco's i Draeth Bae Baglan, gan gynnwys y twyni ar y traeth hwn.

Dywedodd yr Arolygydd Jared Easton:

"Mae Ymgyrch Adriatic yn ymateb amlasiantaeth cydgysylltiedig sydd wedi cael ei lansio i sicrhau bod glan y môr Aberafan yn parhau i fod yn lle diogel, croesawgar a phleserus i bawb yn ystod y gwanwyn a'r haf. Bydd yr ymgyrch yn canolbwyntio ar ymgysylltu â'r cyhoedd ac atal ymddygiad gwrthgymdeithasol.

"Mae'r ymgyrch yn rhan o'n gwaith tymhorol ehangach i gefnogi'r gymuned leol ac ymwelwyr drwy annog ymddygiad cadarnhaol a chyfrifoldeb ar y cyd am gadw amgylchedd y traeth yn ddiogel a pharchus.

"Mae gweithio mewn partneriaeth yn allweddol, a thrwy gyfuno adnoddau a rhannu cudd-wybodaeth, rydym mewn sefyllfa well i atal problemau rhag gwaethygu a chynnig cymorth lle bo angen.

"Drwy ymgysylltu'n gynnar ac yn aml, gallwn atal problemau cyn iddynt ddechrau a sicrhau bod pawb yn teimlo'n ddiogel ac wedi'u cynnwys."

Os ydych wedi gweld rhywun yn ymddwyn mewn modd gwrthgymdeithasol, rhowch wybod i ni: Riportio ymddygiad gwrthgymdeithasol | Heddlu De Cymru (south-wales.police.uk)

Dywedodd y Cynghorydd Alun Llewelyn, Dirprwy Arweinydd Cyngor Castell-nedd Port Talbot ac Aelod o'r Cabinet dros Dai a Diogelwch Cymunedol:

"Mae Ymgyrch Adriatic yn rhan allweddol o'n cynlluniau diogelwch yr haf, a thrwy ein Partneriaeth Castell-nedd Port Talbot Mwy Diogel, byddwn yn gweithio'n agos gyda Heddlu De Cymru a phartneriaid eraill i gadw Glan y môr Aberafan yn ddiogel a phleserus i bawb.

"Glan y môr Aberafan yw un o'r llefydd mwyaf poblogaidd yn ein cyngor bwrdeistrefol, ac rydym yn gwybod pa mor bwysig ydyw i deuluoedd, trigolion a busnesau lleol. Drwy gyfuno ein hymdrechion–boed hynny drwy ymgysylltu â chymunedau, allgymorth ieuenctid, neu gamau gorfodi wedi'u targedu lle bo angen–rydym yn helpu i greu amgylchedd croesawgar lle gall pawb deimlo'n ddiogel."

Dywedodd Clive Morris, Rheolwr Gweithrediadau Badau Achub:

"Mae Ymgyrch Adriatic nawr yn cychwyn ar ei phedwerydd tymor. Cafodd ei datblygu i wneud ardal y traeth yn fwy diogel a dymunol i bawb ei mwynhau. Mae'r RNLI wedi ymuno ag asiantaethau eraill i leihau'r amseroedd ymateb i achosion sy'n cynnwys unigolion coll a gwella diogelwch yn gyffredinol ar hyd glan y môr.

"Drwy weithio gyda'n gilydd, rydym wedi creu glan y môr bywiog a chroesawgar sy'n parhau i ddenu mwy o ymwelwyr. Mae bob amser yn bleser gweld ein partneriaid yn Heddlu De Cymru yn gweithio o'n gorsaf – mae eu presenoldeb yn gwneud gwahaniaeth mawr."