Lansio Ymgyrch Lathyrus er mwyn ymdrin â'r defnydd gwrthgymdeithasol o e-feiciau yn Abertawe

Bydd ymgyrch ar y cyd newydd wedi'i lansio pan fydd swyddogion yn mynd i'r afael â'r defnydd gwrthgymdeithasol o e-feiciau yng nghanol dinas Abertawe.

Yn ystod Ymgyrch Lathyrus, a fydd yn dechrau ym mis Mehefin, bydd Heddlu De Cymru, Cyngor Abertawe, a BID Abertawe yn uno er mwyn addysgu a rhoi canllawiau i feicwyr ar y gyfraith gyfredol.

Yn dilyn y cam addysgol hwn, bydd cam gorfodi ar waith er mwyn ymdrin â throseddwyr fydd yn parhau i dorri'r rheolau ac yn achosi ymddygiad gwrthgymdeithasol pellach.

Mae hyn yn dilyn adborth gan drigolion lleol, busnesau ac ymwelwyr sydd wedi codi pryderon mewn perthynas â defnydd anghyfrifol o'r beiciau hyn ledled ardal Canol y Ddinas, p'un a ydynt ar balmantau neu mewn ardaloedd i gerddwyr yn unig.

Ar hyn o bryd, caniateir beiciau trydan yn gyfreithlon ar ffyrdd cyhoeddus a llwybrau beicio yng Nghymru os byddant yn cydymffurfio â gofynion penodol. Yn ôl Rheoliadau Beiciau Pedal a Gynorthwyir yn Drydanol (Diwygio) 2015, mae'n rhaid i e-feiciau gael pedalau, allbwn pŵer o hyd at 250 watt, a dim ond pan fydd y beiciwr yn pedlo y dylent roi cymorth. At hynny, dylai'r cymorth trydanol ddod i ben ar ôl i'r beic gyrraedd cyflymder o 15.5 milltir yr awr.

Disgwylir i ddefnyddwyr beiciau trydan yng Nghymru gydymffurfio â'r un rheoliadau diogelwch â beicwyr. Mae hyn yn cynnwys gwisgo helmed sy'n ffitio'n addas, defnyddio goleuadau ac adlewyrchyddion wrth reidio gyda'r nos neu mewn amodau gwelededd isel, a dilyn cyfreithiau traffig ffyrdd. Gan gydymffurfio â'r gofynion diogelwch hyn, gall ddefnyddwyr beiciau trydan leihau'r risg o ddamweiniau a chyfrannu at amgylchedd beicio mwy diogel.

Cosb am reidio beic ar y palmant yw dirwy hysbysiad cosb benodedig o £30 ar unwaith. Caiff hyn ei godi o dan Atodlen 3 ac Adran 51 Deddf Rheoleiddio Traffig y Ffyrdd 1988.

Dywedodd Arolygydd Cymdogaeth Canol y Ddinas, Andrew Hedley:

“Mae'r cynnydd yn y defnydd o e-feiciau ac e-sgwteri wedi tyfu'n sylweddol dros y blynyddoedd diwethaf. Er bod llawer o bobl yn cydymffurfio â'r gyfraith wrth eu defnyddio, mae nifer o bobl o hyd sy'n credu nad yw'r gyfraith yn berthnasol iddyn nhw. Nhw sydd wedyn yn achosi ymddygiad gwrthgymdeithasol ac yn codi ofn ar y bobl sy'n byw eu bywydau o ddydd i ddydd.

“Nod yr ymgyrch yw addysgu beicwyr mewn perthynas â'r gyfraith a rhoi cyngor iddynt ar eu gweithredoedd. Ni chaiff defnydd gwrthgymdeithasol o'r e-feiciau a'r e-sgwteri hyn ei oddef, a bydd y rhai fydd yn parhau i dorri'r gyfraith yn cael eu trin mewn ffordd fwy cadarn.

“Rydym yn cymryd pob ffurf o ymddygiad gwrthgymdeithasol o ddifrif, ac yn gweithio'n agos gyda'n hasiantaethau partner er mwyn mynd i'r afael â hyn a'i atal, gan ymateb i'r pryderon a godwyd gan y rhai yr effeithiwyd arnynt.”

Dywedodd Robert Francis-Davies, Aelod o Gabinet Cyngor Abertawe ar gyfer Buddsoddiad, Twristiaeth, Digwyddiadau ac Adfywio:

“Rydym am gael canol dinas sy'n groesawgar i bawb ymweld a mwynhau siopa, ymweld â bwyty, caffi, neu ein marchnad dan do sydd wedi ennill gwobrau.

“Nid yw'n iawn bod lleiafrif bach yn amharu ar y gweddill ohonom gyda'u hymddygiad gwrthgymdeithasol. Dyma pam, ochr yn ochr â BID a Heddlu De Cymru, hoffem annog beicwyr e-feiciau i ddilyn y rheolau.

“Rydym yn gwbl gefnogol i'r ymgyrch a fydd yn helpu i sicrhau bod canol y ddinas yn lle y gall pawb ei fwynhau yn ddiogel.”

Dywedodd Andrew Douglas, Rheolwr BID Abertawe:

"Dylai Canol Dinas Abertawe fod yn ardal ddiogel a chroesawgar i bawb, ac rydym yn gwbl gefnogol o Ymgyrch Lathyrus gyda'r gwaith o helpu i wireddu hynny.

“Mae'r cynnydd mewn e-feiciau anghyfreithlon ac anniogel yn peri risg go iawn i gerddwyr ac yn tanseilio'r profiad cadarnhaol rydym yn gweithio'n galed i'w greu ar gyfer ymwelwyr, pobl fusnes, a thrigolion. Mae'r bartneriaeth hon rhwng Heddlu De Cymru a Chyngor Abertawe yn gam rhagweithiol tuag at adennill ein strydoedd ar gyfer defnydd diogel a phleserus, ac rydym yn falch o'i chefnogi, yn enwedig am ei bod yn rhywbeth mor bwysig ar gyfer talwyr trethi BID Abertawe."