Dau ddyn wedi'u carcharu am gyflenwi cyffuriau Dosbarth A yn Abertawe

Mae dau ddyn – un o Abertawe a'r llall o Lundain – wedi cael eu carcharu am ymwneud â chyflenwi cyffuriau Dosbarth A.

Roedd Osman Ishmail, 38 oed o ganol dinas Abertawe, a Mustafa Daud, 43 oed o Silvertown, Llundain, yn teithio mewn car a gafodd ei stopio gan swyddogion ym mis Chwefror wedi i gudd-wybodaeth nodi bod y cerbyd yn gysylltiedig â chyflenwi cyffuriau.

Ni ddaeth swyddogion o hyd i gyffuriau yn y car, ond daethpwyd o hyd i ffôn dros dro, yr oedd y ddau ddyn yn honni nad oedd ganddynt unrhyw wybodaeth amdano. Cafodd y ffôn ei atafaelu, a chadarnhawyd yn ddiweddarach, drwy lawrlwytho'r SIM, ei fod yn gysylltiedig â llinell gyffuriau “Marcus”.

Yn ddiweddarach y diwrnod hwnnw, aeth y ddau ddyn i orsaf heddlu Canol Abertawe gyda defnyddiwr cyffuriau, wedi iddynt ddweud wrtho am honni mai ef oedd perchennog y ffôn. Roeddent wedi cynnig canabis i'r dyn yn gyfnewid am honni mai ef oedd perchennog y ffôn.

Mae Osman Ishmail wedi cael ei ddedfrydu i bum mlynedd a chwe mis yn y carchar. Mae Mustafa Daud wedi cael ei ddedfrydu i chwe blynedd yn y carchar.

Dywedodd Cwnstabl yr Heddlu Howarth:

“Sylweddolodd Osman Ishmail a Mustafa Daud eu bod wedi cael eu dal pan ddaeth swyddogion o hyd i'w ffôn dros dro yn eu cerbyd, a gwnaethant greu cynllun yn gyflym er mwyn ceisio atal swyddogion rhag canfod eu llinell gyffuriau. Yn ffodus, ni wrandawodd y swyddogion arnynt.

"Bu'r ddau ddyn yn rhan sylweddol o gyflenwi cyffuriau Dosbarth A, sef heroin a chocên yn bennaf. Mae'r niwed y mae'r ddau gyffur hyn yn ei achosi i fywydau pobl yn ein cymunedau, yn ddefnyddwyr a'r bobl o'u cwmpas, yn ddifesur.

“Mae'n amlwg nad yw'r ddau ddyn hyn yn poeni dim am hynny – yr arian sy'n dod i mewn yw'r unig beth sydd o bwys iddynt. Nid oes croeso i bobl fel hyn yn ein cymdeithas a byddant nawr yn treulio blynyddoedd o'u bywydau yn y carchar.”