Carcharu dyn o Mayhill ar ôl ymlid gan yr heddlu yn gadael car a oedd yn mynd heibio ar ei do

Mae dyn o Abertawe wedi cael ei garcharu ar ôl gadael cerbyd arall ar ei do ar yr M4 drwy yrru'n beryglus.

Roedd Kyron Farrell, 31 oed o Mayhill, wedi trefnu i fynd i achlysur ceir mawr yn cynnwys tua 100 o bobl ar Heol Milland, Castell-nedd ym mis Mawrth eleni. Cafodd ei weld gan swyddogion yn gyrru am yn ôl ar y ffordd ymadael o'r A474 cyn gyrru i ffwrdd ar gyflymder tuag at Stockham's Corner, lle yn hytrach na ddefnyddio'r cylchfan, gwnaeth dro pedol i fynd yn ôl ar y ffordd A.

Ymunodd â'r A465, lle gyrrodd ar gyflymder o hyd at 110mya er mwyn ceisio dianc rhag yr heddlu. Ar ôl mynd drwy olau coch ac yn gyrru mewn cylchoedd ar y cylchfan yn Llandarsi, ceisiodd deithio tua'r gorllewin ar hyd y ffordd gerbydau tua'r dwyrain.

Wrth i swyddogion geisio stopio cerbyd Farrell, gwrthdarodd â Nissan Micra a oedd yn mynd heibio, gan droi'r Micra drosodd ac achosi iddo rolio nes iddo stopio ar ei do yn y ffordd gerbydau.

Gadawodd Farrell a thri ffrind y cerbyd a gwnaethant geisio ffoi. Daeth ci'r heddlu o hyd i Farrell yn fuan wedyn, yn cuddio mewn tyfiant gerllaw.

Plediodd Farrell yn euog i yrru cerbyd modur yn beryglus a gyrru heb yswiriant.

Mae wedi cael ei ddedfrydu i 16 mis yn y carchar. Cafodd ei wahardd rhag dal trwydded yrru am dair blynedd ac wyth mis.

Dywedodd y Rhingyll Daniel Kathrens:

“Roedd ffordd Kyron Farrell o yrru nid yn unig yn dwp; roedd hefyd yn beryglus iawn, gan iddo yrru drwy olau coch sawl gwaith a gyrru ar gyflymder gwarthus er mwyn ceisio dianc rhag yr heddlu.

“Mae'n wyrth bod y ddau unigolyn diniwed yn y cerbyd a oedd ar ei do wedi gadael heb anafiadau pellach, a gall Kyron Farrell gyfri ei fendithion mai dyna a ddigwyddodd.

“Roedd ei ffordd o yrru hefyd yn peri risg i ddiogelwch ei ddau deithiwr, yn ogystal â defnyddwyr eraill y ffordd. Carchar yw'r unig ganlyniad rhesymol iddo.”