Ddim yn ddoniol nawr... carcharu deliwr cyffuriau a gafodd ei ffilmio yn chwerthin â dyrnaid o arian yn ei law

GWYLIWCH: Iestyn Raven yn dangos dyrnaid o arian cyffuriau wrth honni ei fod 'heb arian' ac 'mewn trafferth' ar y ffôn gyda'r gwasanaeth Credyd Cynhwysol.

Dyma Iestyn Raven. Cafodd y ffilm hon ohono yn siarad â'r gwasanaeth Credyd Cynhwysol ei darganfod ar ffôn sy'n gysylltiedig ag ef. Yn y fideo, mae'n gafael mewn bwndel o arian parod ac yn esgus mai ffôn yw e, gan ddweud 'Dwi'n brin o arian ar hyn o bryd', gan wneud ystumiau a chwerthin i'r camera.

Arian cyffuriau yw'r arian yn ei ddwylo. Ychydig wedi'r recordiad hwn, cafodd Iestyn Raven ei arestio gan Heddlu De Cymru.

Arweiniodd cyfres o arestiadau cyffuriau eraill y swyddogion at y dyn 24 oed o'r Barri a oedd yn rhedeg llinell gyffuriau 'Ronnie and Reggie', a oedd yn cyflenwi crac cocên a heroin ledled Bro Morgannwg.

Cafodd Raven ei adnabod gan swyddogion ar ôl iddo gael ei ddal ar CCTV yn rhoi data ar un o'r ffonau roedd yn eu defnyddio i werthu cyffuriau.

Cafodd ei arestio ar 30 Medi pan wnaeth swyddogion o Dîm Troseddau Cyfundrefnol Caerdydd a Bro Morgannwg ei weld yn sedd teithiwr car a oedd yn aros am fwyd yn McDonalds yn y Barri.

Pan wnaethant chwilio'r tŷ roedd yn byw ynddo, cafodd un o'r ffonau cyffuriau dan ymchwiliad ei ddarganfod mewn drôr wrth ochr gwely. Cafodd crac cocên, heroin, arian parod a dillad drudfawr eu darganfod hefyd.

Cyhuddwyd Raven o ymwneud â chyflenwi heroin, ymwneud â chyflenwi crac cocên a chaffael eiddo troseddol ac yn dilyn hynny, plediodd yn euog.

Ddydd Mercher, 16 Ionawr, ymddangosodd i gael ei ddedfrydu yn Llys y Goron Merthyr Tudful lle cafodd ei garcharu am 40 mis blwyddyn.

Dywedodd y Ditectif Arolygydd Tim Jones:

"Roedd Iestyn Raven yn gwneud swm sylweddol o arian o ddelio mewn cyffuriau ac yn byw bywyd cymharol foethus ar draul eraill.

"Mae ei ddiystyrwch dirmygus o'r niwed roedd yn ei achosi yn amlwg - yn sicr, dydy e ddim yn chwerthin nawr ac mae'n haeddu bod yn y carchar lle gall fyfyrio ar y llwybr roedd wedi'i ddewis iddo'i hun a'r gofid y mae wedi'i achosi drwy ddelio mewn cyffuriau.

Ychwanegodd, "Gallwch fod yn sicr y byddwn yn defnyddio'r Ddeddf Enillion Troseddau i sicrhau nad yw'n cael budd o unrhyw enillion amheus pan fydd yn cael ei ryddhau."