Dau ddyn wedi'u harestio a'u cyhuddo o ddwyn fan a pheiriannau gwerth mwy na £100k fel rhan o ddiwrnod gweithredu gan yr heddlu

Roedd Kevin Price a Christopher Price o'r Sblot ymysg 32 o bobl a gafodd eu harestio yng Nghaerdydd ddoe (dydd Iau 15 Ionawr) fel rhan o ymgyrch ledled y ddinas.

Nod y diwrnod oedd rhoi unigolion y mae'r heddlu yn chwilio amdanynt yn y ddalfa.

Gwnaed arestiadau pellach yn Llanedeyrn, Trelái, Bae Caerdydd, Canol y Ddinas, y Barri, Cathays, Llanisien, y Rhath, Cathays a'r Tyllgoed

Roedd yr arestiadau am amrywiaeth o droseddau gan gynnwys dwyn, ymosod, treisio, meddu ar arf ymosodol, trais domestig, bod yn destun gwarant, difrod troseddol ac aflonyddu.

O blith y 32 o bobl, cafodd chwech eu galw yn ôl i'r carchar.

Cafodd Kevin Price, 44 oed, a Christopher Price, 47 oed, eu harestio gan Dîm Plismona yn y Gymdogaeth y Rhath a gwnaethant ymddangos gerbron Llys Ynadon Caerdydd heddiw (dydd Gwener 16 Ionawr).

Mae Christopher Price wedi'i gyhuddo o dri achos o ddwyn ac un achos o ymgais i ddwyn.

Mae'r cyhuddiadau yn ymwneud â pheiriant sglodion coed, fan Ford Transit, generadur a chyfarpar weldio.

Mae Kevin Price wedi'i gyhuddo o un achos o ddwyn yn ymwneud â'r Ford Transit.

Byddant yn cael eu cadw yn y ddalfa nes y caiff gwrandawiad arall ei gynnal y mis nesaf.

Dywedodd yr Arolygydd Gerallt Hughes o Heddlu De Cymru: “Mae'r arestiadau yn golygu nad yw nifer mawr o unigolion yr oedd yr heddlu yn chwilio amdanynt ar ein strydoedd mwyach ac, felly, bod ein strydoedd yn fwy diogel.

“Dim ond un enghraifft o lawer yw'r ymgyrch hon o'r gwaith rydym yn ei wneud i gadw Caerdydd yn ddiogel.”