Mae Heddlu De Cymru yn cefnogi ymgyrch i wneud rhedeg yn fwy diogel i fenywod y gaeaf hwn

Dylai rhedeg deimlo'n rhydd, yn ddiogel ac yn gyfartal, ond i lawer o fenywod, mae'r realiti yn wahanol iawn. Bob hydref, wrth i'r clociau fynd yn ôl ac wrth iddi dywyllu'n gynt, mae menywod ledled Cymru yn wynebu pryderon cynyddol am ddiogelwch wrth redeg yn y tywyllwch.

Mae Athletau Cymru, ynghyd â'r pedwar heddlu yng Nghymru, yn lansio Own The Night / Ein Nos Ni, sef ymgyrch genedlaethol i herio'r gwirionedd hwnnw.

Nod yr ymgyrch yw:

• Codi ymwybyddiaeth o bryderon menywod am ddiogelwch wrth redeg gyda'r nos neu'n gynnar yn y bore.
• Grymuso menywod i barhau i redeg yn hyderus yn ystod misoedd y gaeaf.
• Addysgu cymunedau rhedeg a'r cyhoedd ehangach am gynghreiriaeth a ffyrdd ymarferol o gefnogi menywod.
• ‘Adennill y strydoedd’ – annog grwpiau a chlybiau ledled Cymru i gynnal digwyddiad rhedeg grŵp ddydd Sul 26 Hydref, y diwrnod bydd y clociau'n mynd nôl. 
• Drwy adrodd straeon beiddgar, addysg ymarferol ac ysgogi'r gymuned, nod ymgyrch Ein Nos Ni yw uno rhedwyr, clybiau a'r cyhoedd i greu amgylchedd mwy diogel a mwy cynhwysol i fenywod sy'n rhedeg.

Dywedodd Hannah Baulch, Pennaeth Cyfranogiad Athletau Cymru:

Mae twf anhygoel yn nifer y bobl sy'n rhedeg yng Nghymru ar hyn o bryd, gyda 293,000 o oedolion yn gwneud hynny'n rheolaidd drwy weithgareddau wedi'u trefnu a gweithgareddau anffurfiol.

Mae Athletau Cymru yn falch bod rhedwyr benywaidd wedi cyfrannu at fwy na hanner ein ffigurau aelodaeth ers 2020, ystadegyn sy'n anodd ei ddyblygu mewn chwaraeon eraill.

Fodd bynnag, rydym yn ymwybodol iawn o'r heriau niferus y mae rhedwyr benywaidd yn eu hwynebu yn ystod misoedd y gaeaf. Mae'n fwy na thywydd oer a ffyrdd llithrig, mae'n ymwneud â diogelwch.

Mae ymchwil gan This Girl Can yn dangos bod bron tri chwarter (72%) y menywod yn y DU yn newid eu gweithgarwch yn yr awyr agored dros y gaeaf, a dangosodd arolwg diweddar gan Our Streets Now fod 93% o fenywod wedi wynebu aflonyddu rhywiol cyhoeddus wrth redeg. Mae'n annerbyniol, ac rydym am gael eich help i wneud newid cymdeithasol.

Neithiwr yn y Senedd, gwnaethom ofyn i Lywodraeth Cymru am ei hymrwymiad i wneud ein strydoedd yn fwy diogel, ond rydym am i gymunedau ledled Cymru ddangos eu cefnogaeth hefyd drwy barchu rhedwyr eraill a thynnu sylw at ymddygiad gwael. Gyda'n gilydd, gallwn wneud gwahaniaeth gwirioneddol.

Dywedodd y Ditectif Uwch-arolygydd Tracey Rankine, pennaeth yr heddlu ar gyfer Trais yn Erbyn Menywod a Merched yn Heddlu De Cymru:

Mae'n gwbl annerbyniol bod menywod yn newid eu llwybrau rhedeg, yn osgoi rhai lleoliadau neu'n dewis peidio â rhedeg gyda'r nos oherwydd ymddygiad pobl eraill. Mae pawb yn haeddu bod a theimlo'n ddiogel a mwynhau ein mannau cyhoeddus, heb ofn.

Byddwn yn mynychu digwyddiadau parkrun a grwpiau rhedeg i siarad â rhedwyr, a hoffwn roi sicrwydd i bobl y byddwn yn gwrando ar eich pryderon.

Rwy'n annog unrhyw un sy'n profi aflonyddu neu fygythiad i roi gwybod i'r heddlu am unrhyw bryderon fel y gallwn roi diwedd ar yr ymddygiad hwn.

I Jen Stone, rhedwr o Glwb Rhedeg Heol Albany, mae'r heriau hyn yn rhy gyfarwydd.

Un o'r eiliadau mwyaf dychrynllyd rwyf wedi ei hwynebu oedd ychydig flynyddoedd yn ôl. Roeddwn yn rhedeg ar hyd Cyncoed Road tua 6.30pm yn y gaeaf, ac roedd hi'n dywyll yn barod. Clywais weiddi uchel dros fy nghlustffonau o gar yn llawn dynion ifanc yn chwerthin wrth fynd heibio. Roeddwn yn ofnus ac yn bryderus iawn, ac roeddwn wir yn meddwl bod yr un car yn fy nilyn. Penderfynais gwtogi fy llwybr a rhedais adref cyn gynted ag y gallwn.

Anaml rwy'n rhedeg ar ben fy hun nawr, yn enwedig yn y tywyllwch. Dyna pam ymunais â'r clwb rhedeg, mae'n teimlo'n llawer mwy diogel.

Rwy'n cefnogi ymgyrch Ein Nos Ni yn llawn oherwydd mae pawb yn haeddu teimlo'n ddiogel wrth redeg.

Wrth i'r clociau fynd yn ôl y mis Hydref hwn, bydd ymgyrch Ein Nos Ni yn dod â rhedwyr ynghyd ledled Cymru i gefnogi un gred a rennir: dylai rhedeg deimlo'n ddiogel i bawb, ni waeth faint o'r gloch yw hi.