Carchar am oes am achosion lluosog o dreisio yn erbyn dau blentyn ac oedolyn yng Nghaerdydd

Mae Anthony Nash wedi cael ei ddedfrydu i garchar am oes am achosion lluosog o dreisio yn erbyn dau blentyn ac oedolyn yng Nghaerdydd.

Roedd ei oroeswyr yn ddewr i roi gwybod i Heddlu De Cymru am ei droseddau ym mis Chwefror 2023.

Dau ddiwrnod yn ddiweddarach cafodd Nash ei arestio yn ei gartref yn Birmingham.

Gwadodd y dyn 47 oed y cyhuddiadau mewn cyfweliad ond cafodd ei gyhuddo a phlediodd yn euog yn ddiweddarach i'r 13 o achosion o dreisio.

Cafodd ei ddedfrydu yn Llys y Goron Caerdydd ddydd Mercher, 15 Hydref, i garchar am oes a dywedwyd wrtho fod yn rhaid iddo aros yn y carchar am o leiaf 15 mlynedd cyn y gellir ystyried ei ryddhau.

Clywodd y llys fod Nash wedi cynnal ymgyrch o gam-drin ac fe'i ystyriwyd yn droseddwr peryglus.

Dywedodd y Ditectif Gwnstabl Harriet Jones, o Heddlu De Cymru: "Mae'r rhain yn droseddau erchyll yn erbyn y dioddefwyr mwyaf agored i niwed.

"Hoffwn ganmol y dewrder a'r hyder a ddangosodd y dioddefwyr drwy roi gwybod i'r heddlu, rhannu'r hyn a ddigwyddodd a chefnogi'r ymchwiliad.

"Rwyf yn gobeithio y bydd y canlyniad yn y llys yn rhoi cysur iddynt bod cyfiawnder wedi cyrraedd y troseddwr a bod eu dewrder wedi helpu i amddiffyn y cyhoedd ehangach rhag niwed."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod amdano i'r heddlu eto, peidiwch â dioddef yn dawel.

Gellir dod o hyd i gyfoeth o wybodaeth a manylion am wasanaethau cymorth yma.