Carcharu dyn o Abertawe ar ôl iddo bledio'n euog i dreisio dioddefwr gwrywaidd agored i niwed

Mae dyn o Abertawe wedi cael ei garcharu ar ôl pledio'n euog i dreisio ac ymosod yn rhywiol ar ddioddefwr gwrywaidd.

Aeth Johnathan Jones, 41 oed o Sgeti, â'i ddioddefwr agored i niwed i mewn i giwbicl toiled mewn tafarn a phan geisiodd y dioddefwr ei wthio i ffwrdd, cynigiodd Jones arian iddo er mwyn gallu parhau.

Ar ôl i'r dioddefwr roi gwybod i'r heddlu am y digwyddiad, cafodd Jones ei arestio yr un diwrnod.

Ar ôl honni i ddechrau bod y gweithgarwch rhywiol yn gydsyniol, plediodd Jones yn euog i ddau achos o dreisio, yn ogystal ag achosion pellach o ymosod yn rhywiol ac ymosod drwy dreiddiad.

Rhoddwyd dedfryd o garchar am naw mlynedd i Jones, gyda chyfnod estynedig o bedair blynedd, sy'n golygu y bydd yn treulio cyfanswm o 13 mlynedd yn y carchar.

Dywedodd y Ditectif Gwnstabl Rabaiotti:

“Cymerodd Johnathan Jones fantais o ddyn agored i niwed yn y ffordd fwyaf anfoesol.
“Nid dyma oedd y tro cyntaf i Jones gyflawni trosedd rywiol. Roedd patrwm ymddygiad ganddo yn dilyn troseddau a gyflawnwyd ganddo yn y gorffennol, ond roedd yr achos hwn yn waeth gan fod Jones yn gwybod bod y dioddefwr yn arbennig o agored i niwed.
"Rwyf yn canmol dewrder y dioddefwr wrth roi gwybod i ni am y digwyddiad hwn. Roedd yr ymchwiliad yn un anodd, ond llwyddodd i dynnu dyn peryglus iawn oddi ar y strydoedd am gyfnod sylweddol o amser.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod amdano i'r heddlu eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.