Dyn o Dreharris wedi'i garcharu am gyflawni nifer o droseddau gyrru a chyffuriau.

Cafodd James Gapper, 35 oed o Dreharris, ei garcharu ar ôl cael ei ymlid ym mis Mai 2025

Ymddangosodd gerbron Llys Ynadon Merthyr Tudful am y tro cyntaf ddydd Mawrth, 27 Mai 2025, lle plediodd yn euog i fod â chocên yn ei feddiant gyda'r bwriad o'i gyflenwi, bod â chyffuriau dosbarth B yn ei feddiant gyda'r bwriad o'u cyflenwi, bod ag arf ymosodol yn ei feddiant mewn man cyhoeddus, bod â llafn cyllell yn ei feddiant mewn man cyhoeddus, gyrru'n beryglus, methu â darparu sbesimen, gyrru tra roedd wedi'i wahardd, gyrru heb yswiriant a chynhyrchu cyffur a reolir, sef canabis. 

Deilliodd hyn o waith ar y cyd ag uned plismona'r ffyrdd a'r uned troseddau cyfundrefnol a arweiniodd at ymlid yn ystod oriau mân fore dydd Llun, 26 Mai 2025.

Dilynodd swyddogion plismona'r ffyrdd ar yr A470 y Volkswagen Golf am gyfnod byr cyn gofyn i Gapper stopio. Gwrthododd wneud hynny a pharhaodd i yrru ar gyflymder gan osgoi'r swyddogion, a bu bron iddo achosi sawl damwain. Yn ystod yr ymlid, gwelwyd Gapper yn taflu cyffuriau allan o ffenestr y car.

Cafodd ei arestio a chanfuwyd bod ganddo gocên, dyrnau haearn, ac eitem lafnog fawr yn ei feddiant. Ar ôl chwilio ei eiddo, daethpwyd o hyd i ffatri canabis fach yn yr atig, a daeth y swyddogion hefyd o hyd i egin canabis a bagiau zip â phowdr gwyn ynddynt.

Cafodd Gapper ei ddedfrydu yn Llys y Goron Caerdydd ddydd Llun, 1 Gorffennaf 2025, i bedair blynedd a chwe mis yn y carchar a'i wahardd rhag gyrru am ddwy flynedd arall.

Dywedodd y Rhingyll Jones: “Mae James Gapper yn unigolyn peryglus nad yw wedi dangos unrhyw ystyriaeth i ddiogelwch y rhai o'i gwmpas. Gall car yn y dwylo anghywir fod yn arf angheuol.

Does dim lle i yrru'n beryglus na chyffuriau yn ein cymuned, ac rwy'n falch o weld y ddedfryd hon yn cael ei rhoi”