Mae Heddlu De Cymru yn parhau i ymchwilio i ddiflaniad Charlene Hobbs

Mae Heddlu De Cymru yn parhau i ymchwilio i ddiflaniad Charlene Hobbs.

Mae heddiw (24 Gorffennaf, 2025) yn nodi blwyddyn ers i Charlene gael ei gweld ddiwethaf, ac mae ei diflaniad yn cael ei drin fel llofruddiaeth.

Mae gwobr hyd at £20,000 ar gyfer gwybodaeth am lofruddiaeth Charlene Hobbs yn parhau i fod ar gael gan elusen Crimestoppers.

Hyd yn hyn, mae'r ymchwiliad wedi cynnwys:

• Deg apêl yn y cyfryngau
• siarad â 400 o bobl mewn cysylltiad â'r ymchwiliad.
• ymweld â 629 o eiddo fel rhan o ymholiadau o dŷ i dŷ yn ogystal â chwiliadau mewn eiddo gwag, cerbydau, tir agored, a dyfrffyrdd.
• Adolygu dros 1000 o oriau o ddeunydd teledu cylch cyfyng cyhoeddus a phreifat.
• cofnodi dros 3300 o ddogfennau.
• Cynnig gwobr o £20k gan Crimestoppers.

Mae ymchwiliadau pellach, archwiliadau fforensig ac ymholiadau o dŷ i dŷ yn cael eu cynnal.

Dywedodd y Ditectif Brif Arolygydd Matt Powell, o Heddlu De Cymru:

"Mae'r ymchwiliad i ddiflaniad Charlene yn gymhleth a thrylwyr.
"Er y niferoedd mawr o ymholiadau, sy'n parhau, yn anffodus does neb wedi cysylltu â ni gyda gwybodaeth am yr hyn sydd wedi digwydd i Charlene neu ble mae hi.
"Rydym yn parhau yn ymrwymedig i ddod o hyd i Charlene ac mae tîm arbenigol o swyddogion a staff yn canolbwyntio ar yr ymchwiliad."

Y tro diwethaf i Charlene gael ei gweld yn bendant oedd mewn llun a dynnwyd ar ffôn symudol mewn eiddo yn Broadway, Adamsdown, am 06:07am ar 24 Gorffennaf, 2024.

Y diwrnod blaenorol, 23 Gorffennaf, 2024, cafodd Charlene, sydd â thatŵ amlwg o ddraig ar ei chefn, ei gweld ar CCTV yn Morrisons Local, Adamsdown.

Ychwanegodd y Ditectif Brif Arolygydd Powell:

“Mae Charlene yn fam, yn chwaer, yn ferch ac yn ffrind i lawer.  Rydym yn deall bod hyn yn gyfnod anodd tu hwnt, ac, fel ni, maen nhw'n awyddus i gael atebion.
“Mae teulu Charlene yn cael eu cefnogi gan swyddog cyswllt teuluol, ac rydym yn parhau i gyfathrebu â nhw yn unol â'u dymuniadau, ond ddim ond yn cysylltu pan fydd datblygiadau sylweddol.
"Os oes gan unrhyw un wybodaeth, ni waeth pa mor ddibwys ydyw yn eich barn chi, rhowch wybod i ni er ein lles ni, ond hefyd er lles Charlene a'i theulu."

Mae Heddlu De Cymru yn cydnabod y pryderon am y ffordd yr ymdriniwyd ag adroddiadau unigolyn coll blaenorol am ddiflaniad Charlene. Rydym yn adolygu p'un a oedd ein hymatebion i'r adroddiadau hyn yn briodol.

Mae dyn 45 oed a gafodd ei arestio mewn cysylltiad â'r ymchwiliad yn parhau ar fechnïaeth.

Rydym yn ymwybodol i apêl Crimestoppers greu diddordeb cryf, a gwnaeth llawer o bobl ymweld â safle Crimestoppers.

Cafodd unrhyw wybodaeth a rannwyd ei throsglwyddo'n uniongyrchol i dîm yr ymchwiliad. Gall hyd yn oed y darn lleiaf o gudd-wybodaeth fod yn hollbwysig wrth ein helpu i symud ymlaen.

Rydym yn parhau i annog unrhyw un sydd â gwybodaeth i roi gwybod yn ddienw drwy Crimestoppers ar 0800 555 111.

Gellir cyflwyno gwybodaeth a deunydd fideo oddi ar ddyfeisiau fel ffonau symudol, camerâu teledu cylch cyfyng, clychau drws neu gamerâu dashfwrdd i Heddlu De Cymru drwy'r ddolen hon: https://mipp.police.uk/operation/62SWP24B95-PO1

Neu:

• Sgwrs Fyw https://www.south-wales.police.uk/cy-GB
• Cysylltwch â ni drwy https://www.south-wales.police.uk/cy-GB/cysylltu-a-ni/af/ffurflenni-cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/
• Ffonio 101 neu Crimestoppers yn ddienw ar 0800 555 111.

Ffoniwch 999 bob amser mewn argyfwng.

Cyfeirnod: 2400353044