Dyn o Lanrhymni wedi'i garcharu am gyflawni troseddau gyrru a chyffuriau niferus.
Cynnwys y prif erthygl
Cafodd Matthew Jones sy'n 29 oed o Lanrhymni ei garcharu yn dilyn ymchwiliad gan Dîm Troseddau Cyfundrefnol Caerdydd a'r Fro
Mewn gwrandawiad blaenorol, plediodd Jones yn euog i fod yn gysylltiedig â chyflenwi heroin, crac cocên, cocên a chanabis. Yn ogystal â bod ag eiddo troseddol yn ei feddiant a gyrru heb drwydded nac yswiriant.
Ar ôl atafaelu ffôn symudol fel rhan o ymchwiliad ar wahân, gwelodd swyddogion o dîm troseddau cyfundrefnol Caerdydd a'r Fro sgwrs Snapchat o ddiddordeb. Gwnaeth y bobl a oedd yn rhan o'r sgwrs drafod gwerthu swm mawr o gyffuriau Dosbarth A a B, yn ogystal â'r elw mawr roedd y grŵp troseddau cyfundrefnol yn ei wneud o'u gweithgareddau troseddol.
O ganlyniad i'r ymchwiliad, cafodd Jones ei adnabod fel un o'r bobl a oedd yn rhan o'r sgwrs, roedd yn cael diweddariadau dyddiol ar sut roedd y gwerthiant yn datblygu a faint o arian oedd yn cael ei wneud. Canfuwyd wedyn bod Jones yn chwarae rôl arweiniol o fewn y grŵp troseddau cyfundrefnol, a oedd yn llenwi strydoedd Llanrhymni â chyffuriau Dosbarth A a B.
Cyfaddefodd Jones iddo fod yn ymwneud â chyflenwi 466g o heroin, 1kg o gocên a 3kg o ganabis.
Ddydd Gwener, 27 Mehefin, 2025, yn Llys y Goron Caerdydd, cafodd Jones ei ddedfrydu i chwe blynedd a naw mis yn y carchar ac fe'i gwaharddwyd rhag gyrru am bedair blynedd.
Dywedodd Cwnstabl yr Heddlu Homan: "Bydd delio cyffuriau Jones heb os wedi cael effaith ar y gymuned leol ac rwy'n falch ei fod yn cael dedfryd sylweddol.
“Mae gennym ddull gweithredu dim goddefgarwch mewn perthynas â delio mewn cyffuriau ar y stryd ac mae ein tîm troseddau cyfundrefnol yn ymrwymedig i adnabod ac arestio'r rhai sy'n gysylltiedig"