Deddfwriaeth newydd yn gwahardd cleddyfau ninja yn y DU mewn grym o heddiw ymlaen

O heddiw ymlaen (dydd Gwener 1 Awst) bydd yn anghyfreithlon i rywun fod â chleddyfau ninja yn ei feddiant, eu gweithgynhyrchu, eu mewnforio neu eu gwerthu yn y DU.

Y gwaharddiad yw rhan olaf Cyfraith Ronan, fel y'i gelwir, a fydd yn cael ei chyflwyno er mwyn mynd i'r afael â'r pla cenedlaethol o droseddau cyllyll.

O heddiw ymlaen gallai unrhyw un sy'n cael ei ddal â chleddyf ninja yn ei feddiant yn breifat wynebu chwe mis o garchar a bydd hyn yn codi'n ddiweddarach i ddwy flynedd o dan fesurau newydd yn y Bil Troseddu a Phlismona. Mae cosb eisoes o hyd at bedair blynedd o garchar am gario unrhyw arf mewn man cyhoeddus.

Daw'r gwaharddiad i rym heddiw yn dilyn cynllun ildio arfau cenedlaethol mis o hyd, a oedd yn annog pobl i gyflwyno unrhyw gyllyll zombie yn ddiogel yn eu gorsaf heddlu leol. Roedd hefyd wedi galluogi pobl i gofrestru am iawndal am ildio'r arfau, y gallai rhai ohonynt fod wedi cael eu prynu at ddibenion addurnol neu grefyddol.

Fel pob heddlu arall, cefnogodd Heddlu De Cymru y cyfnod amnest, a barodd drwy gydol mis Gorffennaf. Yn ystod y cyfnod hwnnw, cafodd 14 o gleddyfau eu derbyn a chafodd pum cais am iawndal eu cyflwyno.

Diolchodd yr Uwch-arolygydd Donna Llewellyn, arweinydd troseddau cyllyll yr heddlu, i'r cyhoedd am eu cydweithrediad a'u hymrwymiad i helpu i atal arfau a allai ladd rhywun rhag mynd i'r dwylo anghywir.

Ychwanegodd yr Uwch-arolygydd Llewellyn:

“Gwyddom nad oedd pawb a oedd â chleddyf ninja yn eu meddiant yn bwriadu cyflawni trosedd – gallant fod yn boblogaidd gyda phobl sy'n frwd dros grefftau ymladd a chael eu defnyddio at ddibenion addurnol, er enghraifft.

“Ond rydym wedi gweld achosion mewn rhannau eraill o'r DU lle maent wedi cael eu defnyddio fel arfau angheuol, ac mae gan bob un ohonom gyfrifoldeb i atal arfau o'r fath rhag mynd i'r dwylo anghywir a chydweithio i fynd i'r afael â throseddau cyllyll.

“Mae troseddau cyllyll yn dal yn gymharol brin yn Ne Cymru, ar y cyfan, ac rydym yn benderfynol o sicrhau bod y sefyllfa hon yn parhau. Ni fyddwn yn gorffwys ar ein rhwyfau a byddwn yn parhau i wneud popeth o fewn ein gallu i fynd i'r afael â'r broblem a dwyn y rhai sy'n cyflawni troseddau cyllyll i gyfrif.

“Rydym yn parhau i weithio'n agos gydag Uned Atal Trais Cymru a Chomisiynydd Heddlu a Throseddu De Cymru i godi ymwybyddiaeth o ymgyrch Ddim Yr Un er mwyn newid canfyddiadau ymhlith pobl ifanc y bydd cario cyllell yn eu gwneud yn fwy diogel, pan mai'r gwrthwyneb sy'n wir, mewn gwirionedd.”

Ychwanegodd Emma Wools, Comisiynydd Heddlu a Throseddu De Cymru:

“Rwy'n ymrwymedig i greu De Cymru diogel, cyfiawn a chynhwysol i bawb. Bydd gwaredu ein cymunedau rhag yr arfau peryglus a niweidiol hyn yn cyfrannu at gyflawni'r nod hwn, ochr yn ochr â'n hymyriadau wedi'u targedu megis Cronfa Hotspots Action a'n cymorth parhaus i Unedau Atal Trais. Gwyddom fod troseddau cyllyll yn destun cryn bryder i bawb a, thrwy ein cyllid ar gyfer ardaloedd problemus, rydym wedi gweld lleihad o 22% mewn troseddau sy'n ymwneud â bod ag arfau yn eich meddiant a gostyngiad o 19% mewn niwed.

“Bydd y fenter genedlaethol hon yn adeiladu ar ein gwaith yn Ne Cymru, er mwyn ceisio torri'r cylch o unigolion yn cario cyllyll a byddwn yn parhau i gefnogi mentrau wedi'u targedu er mwyn diogelu ein plant a'n pobl ifanc rhag niwed a thrais.”

Er bod y cyfnod ildio ac iawndal bellach wedi dod i ben, rydym yn parhau i annog unrhyw un sydd â chleddyf ninja yn ei feddiant ond nad oedd, o bosibl, yn ymwybodol o'r newid i ddeddfwriaeth, gysylltu â ni er mwyn trefnu iddo gael ei waredu'n ddiogel ac osgoi torri'r gyfraith.