Dau gi o Gartref Cŵn Caerdydd yn ymuno â Heddlu De Cymru fel cŵn chwilio arbenigol

Mae dau gi achub wedi profi y gall ail gyfle arwain at bethau anhygoel. Mae Max a Chase, y cafodd y ddau ohonynt eu mabwysiadu o Gartref Cŵn Caerdydd, wedi cael eu derbyn yn swyddogol i'n hadran gŵn ar ôl cwblhau eu hyfforddiant yn llwyddiannus a chael eu trwydded ddydd Mercher 16 Gorffennaf.

Roedd Max, sbaengi adara du, yn gi crwydr. Ei enw ar y pryd oedd Humbug, a dangosodd arwyddion cynnar o ddeallusrwydd, ffocws ac egni – nodweddion a ddenodd sylw'r ganolfan achub. Roedd dechrau Chase, sy'n gyfuniad o gi defaid/sbaengi, yn wahanol. Ei enw gwreiddiol oedd Neptune ac roedd yn rhan o dorllwyth nad oedd neb ei heisiau. Yn naw wythnos oed, rhoddodd ei swyddog trin cŵn gartref iddo, ar ôl gweld ei botensial ar unwaith.

Yn ystod y chwech wythnos diwethaf, mae'r ddau gi wedi bod yn ymgymryd â hyfforddiant trylwyr mewn sgiliau canfod arbenigol. Maent wedi cwblhau tri modiwl sy'n golygu eu bod bellach yn gymwys i ganfod cyffuriau, arian parod ac olion arfau tanio – sgiliau hanfodol a fydd yn helpu i fynd i'r afael â throseddau difrifol a chyfundrefnol ledled de Cymru.

Canmolodd Rhingyll Nathan Burton gyflawniadau'r ddau:

“Mae Max a Chase yn enghreifftiau ardderchog o sut y gall cŵn achub, o gael yr arweiniad cywir, gyflawni pethau anhygoel. Mae eu penderfynoldeb, eu teyrngarwch a'u greddf yn golygu eu bod yn ychwanegiadau perffaith i dîm cŵn yr heddlu.
“Mae ein swyddogion trin cŵn a'n hyfforddwyr yn neilltuo amser, sgil ac ymroddiad sylweddol i hyfforddi'r cŵn hyn. Mae eu gwaith caled yn hanfodol wrth baratoi'r cŵn hyn i gefnogi plismona rheng flaen ac wrth gadw ein cymunedau yn ddiogel.”

Mynegodd Cartref Cŵn Caerdydd, a oedd yn gyfrifol am achub y ddau gi i ddechrau ac am eu hailgartrefu, falchder a boddhad wrth glywed y newyddion.

Dywedodd Maria Bailie, Rheolwr Cartref Cŵn Caerdydd:

“Mae cyflawniadau Max a Chase yn dangos y gwahaniaeth eithriadol y gall paru'r cŵn cywir â'r cartrefi cywir ei wneud i'w bywydau. Er bod y ddau wedi dod atom i gael gofal am wahanol resymau, roedd yn gwbl amlwg fod angen gwaith arnynt i'w cadw'n hapus ac i'w hysgogi'n feddyliol.
“Mae gan dîm y Cartref Cŵn berthynas waith ardderchog â Heddlu De Cymru ac mae pawb wrth eu bodd fod Max a Chase wedi dod o hyd i yrfaoedd newydd cyffrous, yn ogystal â chartrefi hapus a gofalgar.”

Maent bellach yn barod i ddechrau gweithio a byddant yn helpu i ddatrys troseddau ledled de Cymru. Croeso i Dîm HDC, PD Max a PD Chase!