Cyfrifydd wedi'i charcharu am dwyll
Cynnwys y prif erthygl
Mae cyfrifydd a symudodd filiynau o bunnoedd o gyfrif ei chyflogwr i'w chyfrif ei hun dros gyfnod o chwe blynedd wedi cael ei charcharu.
Plediodd Jemma Lewis o Sain Nicolas ym Mro Morgannwg yn euog i bum achos o dwyll drwy gam-drin statws.
Symudodd Lewis gyfanswm o £3.65 miliwn, a gafodd eu ffugio fel taliadau i gwmnïau, o gyfrifon ei chyflogwr i'w chyfrif ei hun.
Unwaith y cafodd y taliadau a'r benthyciadau dilys eu tynnu i ffwrdd, cyfrifwyd bod Lewis wedi elwa o fwy na £2.491 miliwn.
Cafodd Lewis ei dedfrydu yn Llys y Goron Casnewydd ddydd Iau, 24 Gorffennaf, i bum mlynedd yn y carchar.
Dywedodd y swyddog a fu'n ymwneud â'r achos, y Ditectif Gwnstabl Adam Segarty o Heddlu De Cymru: "Defnyddiwyd y rhan fwyaf o'r arian a gafodd Lewis yn anghyfreithlon ar gamblo a byddai Lewis yn ailgamblo unrhyw enillion. Nawr does fawr ddim ganddi o'r £2.491 miliwn ar ôl.
"Mae'r twyll wedi cael effaith ddinistriol ar y dioddefwr, cyflogwr Lewis am 18 mlynedd, ei deulu a phawb a oedd yn gweithio iddo. Ymddiswyddodd un cydweithiwr oherwydd salwch meddwl gan gredu mai ef oedd y rheswm bod prosiectau gwaith yn methu oherwydd prinder arian.
"Rydym yn croesawu'r ddedfryd a osodwyd gan Lys y Goron Casnewydd ac yn gobeithio y bydd yn atal unigolion eraill sy'n ymgymryd â thwyll neu fathau eraill o droseddau economaidd."