Carcharu dynion o Abertawe ar ôl cael eu canfod yn euog mewn cysylltiad â marwolaeth Joshua Norman
Cynnwys y prif erthygl
Mae dau ddyn o Abertawe wedi cael eu carcharu yn dilyn marwolaeth Joshua Norman, 27 oed.
Ddydd Llun, 7 Gorffennaf, cafodd Paul Rosser, 50 oed o Gendros, ei ganfod yn euog o lofruddiaeth Joshua gan reithgor yn dilyn treial yn Llys y Goron Abertawe.
Yn y cyfamser, cafodd Joshua Cullen, 32 oed o Waun Wen, ei ganfod yn euog o ddynladdiad.
Clywodd y llys fod swyddogion wedi cael eu galw i Cwm Road yn Hafod am 12:08pm ar 11 Medi 2024 yn dilyn adroddiadau o drywanu.
Aeth swyddogion, ynghyd â pharafeddygon, i'r safle lle gwnaethant ganfod Joshua Norman a oedd wedi cael anaf difrifol i'w wddf. Er gwaethaf ymdrechion gorau'r sawl a oedd yn bresennol, cafodd ei ddatgan yn farw yn fuan wedi hynny.
Dywedodd tystion eu bod wedi gweld Rosser yn gadael y safle a chafodd ei weld yn fuan wedi hynny gan swyddogion a'i arestio ar Cwm Road llai nag awr ar ôl yr ymosodiad. Roedd Rosser yn waed i gyd ac roedd wedi cael anafiadau i'w wyneb. Cafodd ei arestio a'i gludo i'r ysbyty am archwiliadau cyn cael ei holi ac wedyn ei gyhuddo.
Heddiw, mae Paul Rosser wedi cael dedfryd am oes, am gyfnod o 18 blynedd a 298 o ddiwrnodau yn y carchar o leiaf.
Mae Joshua Cullen wedi ei ddedfrydu i wyth mlynedd yn y carchar.
Dywedodd y Ditectif Brif Arolygydd Lianne Rees:
“Dim ond 27 oed oedd Joshua Norman, pan gafodd ei fywyd ei gymryd oddi wrtho yng ngolau dydd, ar 11 Medi y llynedd.
“Roedd Joshua yn fab, yn dad, yn frawd, yn nai ac yn ewythr annwyl iawn. Caiff ei ddisgrifio gan ei deulu fel person hyfryd y byddai ei wên a'i synnwyr digrifwch yn goleuo unrhyw ystafell.
“Mae teulu Joshua wedi dangos cryfder ac urddas mawr yn ystod yr ymchwiliad a'r broses gyfreithiol. Rydym yn meddwl amdanynt heddiw a thrwy gydol yr amser, ac rwy'n gobeithio y bydd y dedfrydau heddiw yn eu helpu i gael rhywfaint o gysur mewn cyfnod sydd wedi bod yn eithriadol o anodd.
“Hoffwn dalu teyrnged i aelodau'r cyhoedd a'r gwasanaethau brys a oedd yn bresennol ar y diwrnod hwnnw, a weithiodd mor galed i helpu Joshua a cheisio achub ei fywyd.
“Hoffwn hefyd ddiolch i dîm ymchwilio'r heddlu, Gwasanaeth Erlyn y Goron a'r Cwnsler Erlyn, y mae eu gwaith caled a'u hymroddiad wedi cyfrannu at ganlyniad heddiw.”