Mae Heddlu De Cymru yn dechrau ymchwiliad ar y cyd yn dilyn tân mewn tŷ ar Protheroe Street, Glynrhedynog

Cafodd Heddlu De Cymru alwad am 1.25am fore heddiw, dydd Llun 28 Gorffennaf, yn rhoi gwybod am dân mewn tŷ ar Protheroe Street, Glynrhedynog.

Am ei fod yn dŷ teras, cafodd nifer o dai cyfagos eu gwagio gan swyddogion lleol am resymau diogelwch.

Yn ffodus, er ffyrnigrwydd y tân, ni chafwyd wybod am unrhyw anafiadau difrifol ond cafodd rhai preswylwyr eu trin am anadlu mwg.

Mae arwyddion cynnar yn datgelu bod y tân wedi cael ei gynnau'n fwriadol. O fewn 30 munud i roi gwybod am y tân, cafodd car ei stopio'n rhagweithiol gan swyddogion o'n Huned Plismona'r Ffyrdd a chafodd tri dyn 18, 19 a 23 oed a menyw 19 oed eu harestio ar amheuaetho gynnau tân yn fwriadol gyda'r bwriad o beryglu bywyd. Mae'r pedwar yn parhau yn nalfa'r heddlu. 

Mae swyddogion yn parhau i gadw tâp ynysu'r heddlu ar Protheroe Street wrth i'n hymchwiliadau barhau. Mae'r gwasanaethau brys, gan gydweithio ag asiantaethau partner, yn rheoli'r effaith ar y rhai yr effeithiwyd arnynt a'r gymuned ehangach.  Er mwyn cynnig rhagor o gymorth, mae'r awdurdod lleol wedi creu canolfan orffwys i gefnogi'r rhai sydd wedi'u dadleoli gan y digwyddiad.

Mae'r preswylwyr lleol wedi dangos ysbryd cymunedol cryf gan ddod ynghyd er mwyn cefnogi'r teuluoedd yr effeithiwyd arnynt a hoffwn ddiolch iddynt am eu dealltwriaeth a'u cydweithrediad yn ystod yr ymchwiliad parhaus hwn.

Mae ymchwiliad ar y cyd gan Heddlu De Cymru a Gwasanaeth Tân ac Achub De Cymru wedi dechrau er mwyn ceisio cadarnhau union achos y tân.

Rydym yn gofyn i unrhyw un sydd â deunydd fideo cloch drws neu gylch cyfyng o eiddo ar Protheroe Street, Brown Street, Irfon Street, a New Street rhwng 10pm nos Sul 27 Gorffennaf a 2am fore heddiw, dydd Llun 28 Gorffennaf, gysylltu â ni. Hoffem hefyd glywed gan unrhyw un sydd â deunydd fideo camera dashfwrdd a oedd ar unrhyw un o'r strydoedd ar yr amser a nodwyd drwy gysylltu â ni.