Dyn wedi'i garcharu ar ôl teithio i Abertawe i werthu cyffuriau Dosbarth A

Mae dyn o Swydd Stafford wedi cael ei garcharu ar ôl iddo gael ei ddarganfod yn cyflenwi cyffuriau Dosbarth A yn Abertawe.

Gwelwyd Thomas Hulson, sy'n 22 oed, o Newcastle-under-Lyme, yn ymddwyn yn amheus mewn cerbyd ym Mharc Busnes Ffordd Caerfyrddin yng Nghwmdu.

Roedd defnyddiwr sylweddau dan reolaeth hysbys yn y cerbyd hefyd. Honnodd Hulson iddo ddod i lawr o Stoke-on-Trent ar gyfer ei ben-blwydd ac nad oedd yn adnabod yr unigolyn arall yn y car. Roedd pedwar ffôn symudol, cyfarpar cyffuriau a sylweddau yn ei feddiant ac awgrymodd i'r swyddogion mai rhai Dosbarth A oeddent.

Honnodd hefyd fod pobl eraill wedi taflu cynwysyddion cyffuriau Dosbarth A i mewn i'w gar, ac nad oedd ganddo unrhyw syniad beth oedd ynddynt, er iddo roi'r cynwysyddion hyn yn ei ddillad isaf.

Cafodd Hulson ei arestio ac yna plediodd yn euog i achosion lluosog yn ymwneud â bod â chocên a heroin yn ei feddiant a'u cyflenwi.

Mae wedi cael ei ddedfrydu i 27 mis yn y carchar.

Dywedodd y Rhingyll Lee Johns:

“Mae'n amlwg i Thomas Hulson ddod i Abertawe yn unswydd er mwyn gwerthu cyffuriau Dosbarth A.

“Pan gafodd ei ddal yn y weithred, penderfynodd ddweud celwydd wrth swyddogion yr heddlu am yr hyn roedd yn ei wneud, er gwaetha'r ffaith bod y dystiolaeth yn glir ac yn amlwg ar unwaith.

“Twpdra llwyr oedd hyn ar ran Hulson, fel ag oedd bod yn rhan o'r fasnach gyffuriau anghyfreithlon yn y lle cyntaf.

"Bydd yn talu am y twpdra hwnnw gyda chyfnod yn y carchar.”