39 o arestiadau a saith llinell gyffuriau wedi'u cau mewn wythnos o weithredu

Arweiniodd gweithgarwch Heddlu De Cymru fel rhan o Wythnos Dwysáu Gwaith ar Linellau Cyffuriau at arestio dros 39 o unigolion ac atafaelu cyffuriau dosbarth A a B, cyllyll ac arian parod.

Cydweithiodd timau Troseddau Cyfundrefnol, timau Cudd-wybodaeth a thimau Cam-fanteisio ledled de Cymru i gyflawni gweithrediadau wedi'u hanelu at ddiogelu dioddefwyr a oedd wedi dioddef cam-fanteisio, adnabod y rhai sy'n gwerthu cyffuriau yn ein cymunedau a'u harestio, a chau llinellau cyffuriau ledled ardal yr heddlu.

Hefyd treuliodd timau cymdogaeth amser yn y gymuned yn benodol mi godi ymwybyddiaeth o'r risgiau a'r tactegau sy'n cael eu defnyddio i gam-fanteisio ar bobl sy'n agored i niwed i symud eu cyffuriau ar eu rhan, a phatrolio'r ardaloedd sy'n gysylltiedig â gweithgarwch Llinellau Cyffuriau.

Arweiniodd y gweithgarwch rhwng 23 Mehefin a 29 Mehefin at:

• 39 o arestiadau;
• Atafaelu a chau saith llinell gyffuriau;
• Roedd y cyffuriau a atafaelwyd yn cynnwys:
  • 1kg o gocên
  • 58 gram o grac cocên
  • 26 gram o heroin
  • 516 o blanhigion canabis
  • 690 gram o canabis bud
  • 500 gram o cetamin
• Cafodd £27,195 o arian parod troseddol ei atafaelu;
• Cafodd chwe chyllell eu tynnu allan o'r gymuned;
• Atafaelwyd 61 o ffônau symudol a oedd yn gysylltiedig â gweithgarwch cyffuriau;
• Diogelwyd 10 unigolyn.

Dywedodd Arweinydd Cyffuriau a Reolir yr Heddlu, y Ditectif Uwch-arolygydd Mark Lewis: "Rydym yn parhau yn ymrwymedig yn ein hymdrechion i fynd i'r afael â chyflenwi cyffuriau yn ein cymunedau, dod o hyd i'r rhai sy'n atebol a diogelu'r rhai y camfanteisiwyd arnynt.

"Arweiniodd yr wythnos hon o weithredu, gan gydweithio â heddluoedd a phartneriaid cyfagos at ddymchwel llawer o fentrau troseddol ac atafaelu cyffuriau, arfau ac arian parod a oedd yn gysylltiedig â gweithgarwch anghyfreithlon.

"Mae ein hymdrechion i fynd i'r afael â'r math hwn o drosedd yn parhau bob awr o'r dydd, ac mae ein timau yn ymrwymedig i ganfod ac amharu ar gyflenwi cyffuriau."

Llinellau Cyffuriau yw'r term a ddefnyddir i ddisgrifio achos o ddelio cyffuriau lle caiff ffonau symudol eu defnyddio i gyflenwi cyffuriau, fel arfer o ddinasoedd mawr i drefi ac ardaloedd gwledig. Caiff Llinellau Cyffuriau eu rhedeg gan 'Ddalwyr Llinellau' ac mae'r rhedwyr, sydd weithiau'n bobl agored i niwed, yn dosbarthu'r cyffuriau. Pobl ifanc sy'n cael eu hecsbloetio yw'r rhedwyr yn aml, a gallant fod â chyllyll neu arfau yn eu meddiant. Mae'r system o ddosbarthu cyffuriau yn arwain at drais difrifol a cham-fanteisio.

Cafodd deg unigolyn eu diogelu yn ystod yr wythnos. Credir bod yr unigolion hyn, a oedd yn agored i niwed oherwydd eu hoedran neu eu sefyllfaoedd personol, fel dibyniaeth, wedi cael eu gorfodi a'u rheoli gan gangiau Llinellau Cyffuriau a'u bod yn wynebu risg ddifrifol o niwed o bosibl.