Carcharu dyn o Donysguboriau ar ôl delio cyffuriau mewn ardal chwarae.

Mae dyn o Rondda Cynon Taf wedi cael ei garcharu ar ôl i swyddogion yr heddlu ei weld yn delio cyffuriau mewn ardal chwarae ym Mhontyclun.

Ar 30 Tachwedd 2024, bu swyddogion o'r Uned Troseddau Cyfundrefnol yn dyst i ddêl cyffuriau mewn ardal chwarae ar Heol yr Orsaf, Pontyclun.

Cafodd y dyn ei stopio a'i adnabod fel Courtney Jones, 38 oed o Donysguboriau. Cafodd ei chwilio lle canfuwyd bod ganddo chwe bag o gocên yn ei feddiant. Cafodd Jones ei arestio yn dilyn y chwiliad, ac yn ddiweddarach, gwnaeth swyddogion chwilio ei gyfeiriad cartref a oedd nepell o'r parc.

Yn y cyfeiriad, daeth swyddogion o hyd i swm mawr o gyffuriau gan gynnwys 40 o fagiau ychwanegol o gocên, amffetamin, MDMA a benzocaine.

Ymddangosodd Jones gerbron Llys y Goron Caerdydd lle plediodd yn euog i fod â chyffur Dosbarth A yn ei feddiant gyda'r bwriad o'i gyflenwi – sef cocên ac MDMA, bod â chyffur Dosbarth B yn ei feddiant gyda'r bwriad o'i gyflenwi – sef amffetamin, a chaffael eiddo troseddol.

Ddydd Gwener 4 Ebrill 2025, cafodd Jones ei ddedfrydu i dair blynedd yn y carchar yn Llys y Goron Caerdydd.

Dywedodd y Rhingyll Lia Jones:

“Roedd Jones yn cyflenwi cyffuriau yn anghyfreithlon i bobl yn ei gymuned leol heb ystyried eu llesiant.
“Fel yn achos delwyr cyffuriau eraill, bydd yn cael ei haeddiant drwy gael ei garcharu am sawl blwyddyn.”