Dyn o Gaerdydd wedi'i arestio mewn ardal chwarae gyda gwerth 4k o gyffuriau Dosbarth A

Cafodd Tegan Smith ei arestio ar ôl cael ei weld yn reidio beic trydan drwy ardal chwarae i blant yng Nghaerau, Caerdydd.

Roedd swyddogion ar batrôl mewn dillad plaen ym Mharc Trelái mewn ymateb i bryderon y gymuned am ymddygiad gwrthgymdeithasol a chyffuriau.

Daethant yn amheus pan welsant gyrrwr y beic yn cymryd rhan mewn dêl cyffuriau.

Cafodd Smith, 20 oed, ei arestio a chanfuwyd bod ganddo werth £4,000 o gyffuriau Dosbarth A mewn amrywiaeth o becynnau, pedwar ffôn symudol ac arian parod yn ei feddiant.

Roedd un o'r ffonau yn cynnwys negeseuon yn dyddio'n ôl i fis Ionawr lle roedd wedi bod yn cynnig cyflenwi cyffuriau a reolir.

Yn dilyn ei arestiad brynhawn dydd Llun 10 Mawrth, plediodd Smith yn euog i ymwneud â chyflenwi cyffuriau a reolir Dosbarth A, sef crac cocên a heroin, bod â chyffur a reolir Dosbarth A yn ei feddiant gyda'r bwriad o'i gyflenwi, sef crac cocên, cocên a heroin, a bod ag eiddo troseddol yn ei feddiant.

Cafodd ei ddedfrydu yn Llys y Goron Casnewydd ddoe (Dydd Mawrth 8 Ebrill) i dair blynedd ac wyth mis yn y carchar.

Mae gan Heddlu De Cymru ddull gweithredu dim goddefgarwch mewn perthynas â delio mewn cyffuriau, a dim ond un enghraifft yw hyn o'r gwaith rydym yn ei gyflawni.

Ni fyddwn yn goddef cyffuriau yn ein cymunedau, ac rydym yn targedu'r rhai y credir eu bod yn ymwneud â chyflenwi cyffuriau a reolir yn barhaus.

Gallwn weithredu ar y wybodaeth a gawn gan y cyhoedd, ac rydym yn gwneud hynny'n rheolaidd, felly parhewch i gysylltu a chydweithio â ni.

• Sgwrs Fyw https://www.south-wales.police.uk/cy-GB/
• Rhoi gwybod ar-lein https://www.south-wales.police.uk/cy-GB/riportio/riportio
• 101

Ffoniwch 999 bob amser mewn argyfwng.