Naw aelod o grŵp troseddau cyfundrefnol a thri chwsmer wedi'u carcharu yn dilyn ymchwiliad i achosion o gyflenwi cyffuriau Dosbarth A a B ledled De Cymru

Mae 12 o ddynion wedi cael eu carcharu yn dilyn ymchwiliad i grŵp troseddau cyfundrefnol yn Abertawe.

Rhoddwyd ymgyrch Shelduck, a gynhaliwyd gan Dîm Troseddau Cyfundrefnol Abertawe, Castell Nedd a Phort Talbot, ar waith er mwyn ymchwilio i achosion o gyflenwi cyffuriau Dosbarth A a B, ar ôl i Abdul Mozid gael ei arestio am drosedd nad oedd yn gysylltiedig â chyffuriau ym mis Tachwedd 2023.

Dangosodd ffôn symudol ym meddiant Mozid pan gafodd ei arestio dystiolaeth mai ef oedd prif aelod cynllwyn ar raddfa fawr i gyflenwi cyffuriau a reolir gan gynnwys cocên, MDMA, canabis a chetamin.

Roedd Mozid yn cyfarwyddo'r ymgyrch ar raddfa fawr i gyflenwi cyffuriau Dosbarth A a B i mewn i Abertawe yn ogystal ag ardaloedd yn cynnwys y Pîl, Caerdydd, Caerfyrddin a Bryste, a daethpwyd o hyd i dystiolaeth o rwydwaith gyflenwi sylweddol.

Defnyddiodd y grŵp troseddau cyfundrefnol nifer o lwyfannau sgwrsio wedi'u hamgryptio gan gynnwys Telegram, Signal, WhatsApp a Snapchat. Mae'r llwyfannau hyn yn galluogi'r defnyddiwr i ddefnyddio "dolenni" neu enwau defnyddiwr yn lle rhoi gwybodaeth bersonol. Drwy ddefnyddio'r gwefannau hyn, roedd aelodau o'r grŵp troseddau cyfundrefnol yn ceisio osgoi camau gorfodi'r gyfraith drwy aros yn ddienw. Fodd bynnag, bu modd priodoli naw dyn i enwau defnyddwyr a oedd wedi bod yn anfon negeseuon yn ymwneud â gweithgarwch cyflenwi cyffuriau y grŵp troseddau cyfundrefnol.

Nodwyd bod rhai o'r dynion – Ruhel Chowdhury, Mohammed Hanif Miah, Moinul Islam a Mohammed Robbani – yn gweithio ochr yn ochr â Mozid fel rhan o ymgyrch y grŵp troseddau cyfundrefnol. Nodwyd bod y dynion eraill – Levi Edwards, Bryan Clark, Mohammed Rahman a Diamant Halili – yn 'rhedeg' neu'n cludo cyffuriau ar ran y grŵp troseddau cyfundrefnol.

Nodwyd hefyd sawl cwsmer swmp a oedd wedi derbyn symiau sylweddol o gyffuriau a reolir gan y grŵp troseddau cyfundrefnol. Cafodd y cwsmeriaid hyn – Mohammed Jubair Uddin, Abul Hushain a Jamshed Khan – eu harestio ar wahân i'r naw prif ddiffynnydd ac maent eisoes wedi'u dedfrydu ar ôl iddynt bledio'n euog. Profwyd bod pob un ohonynt yn gwsmeriaid ar raddfa fawr y grŵp troseddau cyfundrefnol a oedd, yn eu tro, yn rhedeg eu hymgyrch cyflenwi cyffuriau eu hunain.

Roedd y grŵp troseddau cyfundrefnol yn defnyddio safle ar Finsbury Terrace, Brynmill, Abertawe fel 'lle diogel'. Daethpwyd o hyd i swm sylweddol o gyffuriau Dosbarth A a B yn ogystal ag arian parod yn ystod gwarant chwilio yn y cyfeiriad:

• Atafaelwyd dros £45,000 mewn arian parod
• Ataliwyd £44,000 o arian parod (enillion troseddau)
• Ataliwyd £12,000 o gryptoarian (enillion troseddau)
• 6.2 cilogram o gocên
• 31.5 gram o grac cocên
• 228 gram o bowdr MDMA
• 970 o dabledi MDMA
• 2.3 cilogram o getamin
• 8 cilogram o ganabis
• 2.4 cilogram o gyfrwng cymysgu

Plediodd pob un o'r diffynyddion yn euog a chawsant eu dedfrydu ym mis Ebrill 2025:

• Abdul Mozid – 10 mlynedd ac 8 mis yn y carchar
• Mohammed Hanif Miah – 10 mlynedd a 6 mis yn y carchar
• Ruhel Chowdhury – 9 mlynedd yn y carchar
• Moinul Islam – 7 mlynedd yn y carchar
• Mohammed Robbani – 4 blynedd a 5 mis yn y carchar
• Diamant Halili – 4 blynedd a 9 mis yn y carchar
• Levi Edwards – 3 blynedd a 9 mis yn y carchar
• Bryan Clarke – 3 blynedd a 9 mis yn y carchar
• Mohammed Rahman – 3 blynedd a 9 mis yn y carchar

Dangoswyd bod y tri diffynnydd canlynol yn gwsmeriaid swmp y grŵp troseddau cyfundrefnol ac yn rhedeg eu hymgyrch cyflenwi cyffuriau eu hunain, ac maent eisoes wedi cael eu dedfrydu:

• Jamshed Khan – 3 mlynedd yn y carchar
• Mohammed Jubair Uddin – 4 blynedd yn y carchar
• Abul Hushain – 6 blynedd a 5 mis yn y carchar a gwaharddiad rhag gyrru am 62 mis

Dywedodd y Ditectif Ringyll Ian Foster:

"Mae ymgyrch Shelduck wedi bod yn ymchwiliad cymhleth iawn i grŵp o ddynion nad oeddent yn poeni am ddim heblaw elwa ar gyflenwi cyffuriau i'n cymunedau.
"Fel llawer o rai eraill cyn hyn sydd wedi meddwl mewn ffordd debyg, nid yw hyn wedi gweithio iddynt, ac maent nawr yn dechrau cyfnod sylweddol yn y carchar.
"Hoffwn gydnabod gwaith Swyddogion Safleoedd Troseddau, yr Uned Ymchwilio Gwyddonol ar y Cyd, COMU, y dadansoddwr a'r ymchwilydd ariannol.
"Hefyd, gwaith y Tîm Plismona yn y Gymdogaeth, y Tîm Cymorth Tiriogaethol, y Tîm Troseddau Cyfundrefnol a'r Cwnstabliaid Gwirfoddol gan mai diwrnod y gwarantau oedd diwrnod pwysicaf yr ymchwiliad.
"Hoffwn gydnabod gwaith y swyddog yn yr achos, PC Owen Smith, a fu'n hanfodol wrth sicrhau'r dedfrydau hyn ar gyfer pawb a oedd yn rhan o'r grŵp troseddau cyfundrefnol."