Carcharu deliwr cyffuriau a gafodd ei ddal mewn fflat gyda chrac cocên

"Mae'r siop ar gau!" – dyma a ddywedodd defnyddiwr cyffuriau pan welodd ddau swyddog yn sefyll yn fflat ei deliwr cyffuriau.

Disgrifiodd swyddogion o Dîm Troseddau Cyfundrefnol Caerdydd a'r Fro sut y daethant o hyd i chwe dyn mewn panig pan wnaethant ymweld yn ddirybudd â fflat un ystafell wely yn Grangetown ym mis Medi (2024).

Roedd Layton Preece, 51 oed, a Dylan Young, 21 oed, yn eu plith ac wedi'u hamgylchynu â chyffuriau a chyfarpar cyffuriau ar y pryd.

Cafodd amheuon y swyddogion fod y fflat yn cael ei defnyddio fel lleoliad gwerthu crac eu cadarnhau pan oeddent yn y fflat - daeth defnyddiwr cyffuriau a churo'r drws a phan agorodd swyddog mewn lifrau'r drws iddi, gadawodd yr eiddo'n frysiog gan weiddi: "mae'r siop ar gau!"

Cafodd gwerth ychydig dros £4,000 o gyffuriau dosbarth A gan gynnwys cocên a chrac cocên eu hatafaelu gan yr heddlu.

Cafodd Layton Preece, heb gartref sefydlog, ei gyhuddo a phlediodd yn euog i fod â chrac cocên yn ei feddiant gyda'r bwriad o'i gyflenwi ac i gael ei ddal â chrac cocên yn ei feddiant.

Cafodd Dylan Young, 21 oed, ei gyhuddo a phlediodd yn euog i fod â chrac cocên yn ei feddiant gyda'r bwriad o'i gyflenwi.

Ar 20 Chwefror, cafodd Preece ei garcharu am 42 mis a chafodd Young ddedfryd o 18 mis, wedi'i ohirio am 21 mis, yn Llys y Goron Caerdydd.