Swyddfa'r Comisiynydd Gwybodaeth: archwiliad o'r defnydd o Dechnoleg Adnabod Wynebau

Heddiw, mae Swyddfa'r Comisiynydd Gwybodaeth wedi cyhoeddi canfyddiadau archwiliad o'r defnydd o Dechnoleg Adnabod Wynebau gan Heddlu De Cymru a Heddlu Gwent.

Dywedodd y Prif Uwch-arolygydd, Tim Morgan, o adran gwasanaethau digidol ar y cyd De Cymru a Gwent:

"Mae'r gwaith goruchwylio a chraffu annibynnol a wnaed ar dechnoleg adnabod wynebau yn golygu ein bod bellach mewn sefyllfa gryfach nag erioed o'r blaen i allu dangos i gymunedau De Cymru a Gwent bod ein defnydd o'r dechnoleg yn deg, yn ddilys, yn foesegol ac yn gymesur.

“Rydym yn croesawu gwaith archwilio Swyddfa'r Comisiynydd Gwybodaeth sy'n rhoi sicrwydd annibynnol i ni o'r graddau y mae'r ddau heddlu yn cydymffurfio â deddfwriaeth diogelu data. Roedd yr archwiliad yn cwmpasu'r defnydd o dechnoleg adnabod wynebau byw yn Ne Cymru, yn ogystal â thechnoleg adnabod wynebau a gychwynnir gan weithredwr a thechnoleg adnabod wynebau ôl-weithredol yn y ddau heddlu.

“Rydym yn deall y pryderon sy'n cael eu codi am y defnydd o dechnoleg adnabod wynebau yn llawn a dyma pam ein bod yn defnyddio unrhyw dechnoleg newydd yn foesegol ac yn buddsoddi amser ac ymdrech i sicrhau ei bod yn cael ei defnyddio yn unol â'r holl ddeddfwriaeth a chanllawiau. Ein blaenoriaeth yw cadw'r cyhoedd yn ddiogel ac mae'r dechnoleg hon yn parhau i'n helpu i ddwyn troseddwyr o flaen eu gwell a diogelu'r cyhoedd.

“Yn dilyn her gyfreithiol mewn ymateb i'r defnydd o dechnoleg adnabod wynebau byw gan Heddlu De Cymru, mae Cod Ymarfer y Comisiynydd Camerâu Gwyliadwriaeth ac Ymarfer Proffesiynol Awdurdodedig y Coleg Plismona wedi cael eu datblygu sy'n nodi ein rhwymedigaethau wrth ddefnyddio technoleg adnabod wynebau byw. Rydym yn croesawu'r canllawiau hyn a byddwn yn cydymffurfio â'r ddau yn gyson.

“Yn dilyn cyfres o dreialon a phrofion a gwerthusiadau data annibynnol gan y Labordy Ffisegol Cenedlaethol, cadarnhawyd nad yw'r dechnoleg yn gwahaniaethu ar sail rhywedd, oedran na hil, yn seiliedig ar y ffordd gyfrifol y caiff technoleg adnabod wynebau ei defnyddio gan Heddlu De Cymru sydd wedi ein galluogi i ddeall y dechnoleg yn well a defnyddio'r amodau gorau lle gall technoleg adnabod wynebau byw weithredu heb unrhyw duedd amlwg tuag at rywedd, oedran na hil. Mae hyn hefyd yn wir am dechnoleg adnabod wynebau a gychwynnir gan weithredwr a thechnoleg adnabod wynebau ôl-weithredol.

“Mae'n bwysig cofio nad yw'r defnydd o hyn erioed wedi arwain at arestio unigolyn ar gam yn Ne Cymru ac na fu unrhyw rybuddion anghywir ers sawl blwyddyn gan fod y dechnoleg a'n dealltwriaeth wedi datblygu."

Mae Heddlu De Cymru yn defnyddio technoleg adnabod wynebau i atal a chanfod troseddau a helpu i ddiogelu'r rhai agored i niwed.

Gall technoleg Adnabod Wynebau gymharu wyneb person o lun digidol â chronfa ddata o wynebau.