Ymchwiliad i lofruddiaeth yn ardal Glan yr Afon: Teulu yn talu teyrnged i Nirodha Niwunhella

Mae aelodau teulu Niwunhellage Dona Nirodha Niwunhella, 32 oed, a oedd yn cael ei hadnabod fel Nirodha, wedi talu teyrnged iddi. Dywedon nhw:

"Rydym yn cofio Nirodha fel merch gariadus, perthynas, a ffrind annwyl i lawer. Caiff Nirodha ei chofio gyda heddwch, cariad, a diolchgarwch.

"Cyffyrddodd â bywydau llawer o bobl gyda'i charedigrwydd a'i chynhesrwydd, a bydd yr atgof ohoni yn parhau i'n hysbrydoli. Er i'w bywyd ddod i ben yn rhy fuan, bydd y cariad a rannodd bob amser yn aros gyda ni.

"Cwsg mewn hedd, angel."

Dywedodd yr Uwch-swyddog Ymchwilio, DCI Matthew Davies:

"Rwy'n cydymdeimlo'n ddiffuant â theulu, ffrindiau, ac anwyliaid Nirodha wrth iddynt ddod i delerau â'r golled drasig hon. Mae gennym swyddogion arbenigol yn cefnogi ei hanwyliaid ar hyn o bryd, a gofynnwn i chi barchu eu preifatrwydd.

"Rwy'n parhau i annog unrhyw un sydd â gwybodaeth ac sydd heb siarad â swyddogion eto i gysylltu â ni a chefnogi ein hymchwiliad."

Cafodd swyddogion eu galw i South Morgan Place, Glan yr Afon am 7.37am ar 21 Awst yn dilyn adroddiadau bod menyw wedi'i hanafu'n ddifrifol.

Cafodd parafeddygon eu galw hefyd, ond er gwaethaf eu hymdrechion gorau, cafodd y fenyw – sydd bellach wedi cael ei hadnabod yn ffurfiol fel Nirodha Niwunhella – ei datgan yn farw yn y fan a'r lle.

Cafodd dyn 37 oed, a oedd yn adnabod Nirodha, ei arestio mewn cysylltiad â'r digwyddiad yn fuan wedyn yn Seawall Road, y Sblot. Mae yn nalfa'r heddlu o hyd.

Mae ditectifs yn parhau i apelio am dystion, neu unrhyw un sydd â deunydd teledu cylch cyfyng neu gamera dashfwrdd gerllaw i gysylltu â nhw. Hoffent glywed yn benodol gan unrhyw un sydd â gwybodaeth am Ford Fiesta llwyd ar South Morgan Place neu Seawall Road neu gerllaw gan gynnwys Wellington Street, Clare Road, Heol Penarth a Dwyrain Stryd Tyndall, rhwng 7.30am a 8.30am.

Rydym yn annog unrhyw un sydd â gwybodaeth i gysylltu drwy'r ddolen hon.