Diweddariad Swyddfa Annibynnol Ymddygiad yr Heddlu yn cadarnhau bod fan yr heddlu hanner milltir i ffwrdd o'r lleoliad ar adeg y gwrthdrawiad angheuol yn Nhrelái yn 2023

Heddiw, mae Swyddfa Annibynnol Ymddygiad yr Heddlu wedi cyhoeddi diweddariad ar ei hymchwiliad i farwolaethau trasig Kyrees Sullivan a Harvey Evans yn Nhrelái yn 2023.

Dywedodd y Prif Gwnstabl Cynorthwyol Simon Belcher:

"Yn dilyn marwolaethau trasig Kyrees Sullivan a Harvey Evans yn Nhrelái yn 2023, gwnaeth Heddlu De Cymru atgyfeiriad gorfodol at Swyddfa Annibynnol Ymddygiad yr Heddlu i sicrhau bod y mater yn destun craffu annibynnol.

"Mae'r heddlu wedi cydweithredu'n llawn ag ymchwiliad Swyddfa Annibynnol Ymddygiad yr Heddlu ac wedi darparu gwybodaeth a deunyddiau, gan gynnwys deunydd fideo camera a wisgir ar y corff a deunydd teledu cylch cyfyng."

Mae ymchwiliad Swyddfa Annibynnol Ymddygiad yr Heddlu wedi canfod bod fan yr heddlu hanner milltir i ffwrdd o Snowden Road ac ar ffordd wahanol pan ddigwyddodd y gwrthdrawiad yn cynnwys e-feic.

Hefyd, daeth yr ymchwiliad i'r casgliad bod gan un swyddog achos i ateb am gamymddwyn difrifol dros fater a ddigwyddodd yn dilyn y gwrthdrawiad, a fydd yn cael ei ystyried mewn gwrandawiad camymddwyn maes o law.

Mae Gwasanaeth Erlyn y Goron eisoes wedi penderfynu na fydd yn dwyn cyhuddiadau troseddol yn erbyn y swyddog ac mae'r teuluoedd wedi arfer eu hawl o dan Hawl Dioddefwyr i Adolygiad i herio'r penderfyniad hwn.

Ychwanegodd ACC Belcher:

"Rydym yn gobeithio y bydd canlyniad yr ymchwiliad annibynnol a'r cwest sydd ar ddod yn cynnig atebion i'r cwestiynau niferus a godwyd am yr achos hwn.

"Rydym yn meddwl o hyd am deuluoedd a ffrindiau Harvey a Kyrees a'r holl bobl y mae eu marwolaethau wedi effeithio arnynt."