Carchar i dreisiwr a geisiodd honni bod ei ddioddefwr wedi breuddwydio ei ymosodiad

Mae dyn a wnaeth gam-drin menyw yn rhywiol a'i threisio ac wedyn ceisio honni ei bod wedi breuddwydio ei ymosodiad wedi cael ei garcharu.

Cafodd Justin Saliba, 50 oed o Lanisien ei garcharu am 11 o flynyddoedd yn Llys y Goron Caerdydd ddydd Llun, 18 Awst.

Mae'r drosedd yn dyddio yn ôl i 2021 a digwyddodd yn ei fflat – ymosododd Saliba ar ei ddioddefwr wrth iddi gysgu.

Deffrodd y dioddefwr i sylweddoli ei fod yn ei threisio a llwyddodd i ffoi ar ôl yr ymosodiad.

Dywedodd wrth ei theulu a gwnaethant gysylltu â Heddlu De Cymru, a chafodd ymchwiliad Heddlu De Cymru ei lansio.

Cafodd Saliba ei arestio a'i gyhuddo o drais a cham-drin rhywiol, ond plediodd yn ddieuog, gan honni bod y dioddefwr wedi drysu rhwng breuddwyd â realiti.

Ond nid oedd y rheithgor yn credu ei gelwyddau a chafodd ei ganfod yn euog a'i gadw yn y ddalfa yn dilyn treial.

Cafodd Saliba ei garcharu am 11 o flynyddoedd a bydd yn bwrw o leiaf ddwy ran o dair o'r ddedfryd cyn iddo gael ei ryddhau ar drwydded. Bydd hefyd yn droseddwr rhyw cofrestredig am weddill ei oes.

Dywedodd y Ditectif Gwnstabl Charlotte Watkins:

“Gwnaeth gweithredoedd Justin Saliba y noson honno niwed anadferadwy i'w ddioddefwr. Gwadodd y drosedd ac wrth wneud hynny mae wedi gorfodi i'w ddioddefwr fynd drwy drawma treial ac wedi gorfodi iddi aros blynyddoedd am gyfiawnder.
“Mae'n rheibiwr peryglus a nawr bydd yn y carchar am nifer o flynyddoedd, lle na fydd yn fygythiad i eraill.
“Rwy'n gobeithio y bydd ei ddioddefwr yn cael rhywfaint o gysur yn gwybod hynny ac y gall ddechrau'r broses anodd o ailadeiladu ei bywyd.”

Os yw trosedd rhywiol wedi effeithio arnoch chi, rhowch wybod i ni. Gall ein tîm o swyddogion sydd wedi'u hyfforddi'n arbennig eich cefnogi.

Am ganllawiau ar sut i roi gwybod am drais rhywiol a throseddau rhywiol eraill, gweler yma: Rhoi gwybod am drais rhywiol, ymosodiad rhywiol a throseddau rhywiol eraill | Heddlu De Cymru