Y defnydd o dechnoleg adnabod wynebau byw gan dimau plismona yn y gymdogaeth yn arwain at adnabod siopladron a throseddwyr a oedd yn destun gwarant chwilio

Mae technoleg Adnabod Wynebau Byw (AWB) wedi'i defnyddio ledled De Cymru yr haf hwn gan dimau plismona yn y gymdogaeth fel rhan o ymrwymiad Menter Strydoedd Mwy Diogel yr Haf.

Nod defnyddio'r dechnoleg yw dod o hyd i unigolion dan amheuaeth, pobl y mae'r heddlu yn chwilio amdanynt a phobl risg uchel sydd ar goll, a pharhau i gadw canol ein trefi yn ddiogel.

O ganlyniad i achosion diweddar o ddefnyddio'r dechnoleg, mae pobl yn cynnwys siopladron, lladron, a phobl a oedd yn destun gwarant chwilio wedi cael eu hadnabod a'u stopio, gan sicrhau diogelwch preswylwyr a busnesau lleol.

Mae'r rhai sydd wedi'u hadnabod yn cynnwys:

• Richard Wolsey, 46 oed, heb gartref sefydlog. Ar ôl cael ei stopio, plediodd yn euog i bum achos o ddwyn yn Llys Ynadon Abertawe ar 16 Awst. Cafodd ei ddedfrydu i chwe mis yn y carchar.
• Nicholas Williams, 39 oed o Flaenymaes. Ar ôl cael ei stopio, plediodd yn euog i bum achos o ddwyn yn Llys Ynadon Abertawe ar 8 Awst. Cafodd ei ddedfrydu i 14 wythnos yn y carchar.
• Darren Williams, 53 oed, heb gartref sefydlog. Ar ôl cael ei stopio, plediodd yn euog i un achos o ddwyn beic pedalau, ac un achos o achosi difrod troseddol i eiddo gwerth llai na £5000 yn Llys Ynadon Abertawe ar 8 Awst. Cafodd ei ddedfrydu i 14 wythnos yn y carchar.
• Roedd Kain Jason, 41 oed o Butetown, yn destun gwarant i'w arestio am dorri'r amodau a bennwyd ar ôl ei ddedfrydu.
• Cafodd Seren Hassan-Lowe, 20 oed o Gaerdydd ei stopio am ei bod yn destun gwarant i'w dychwelyd i'r carchar.
• Cafodd dyn yn ei 50au ei arestio ar amheuaeth o ddau achos o ddwyn, bod â chyffuriau Dosbarth A yn ei feddiant, a materion mewnfudo. Mae wedi cael ei drosglwyddo i'r Gwasanaethau Mewnfudo.
• Cafodd dyn yn ei 40au ei arestio ar ôl i warant gael ei gyhoeddi i'w arestio am ymosodiad â chyllell mewn ardal heddlu arall.

Dim ond un elfen o dechnoleg adnabod wynebau a ddefnyddir gan Heddlu De Cymru (HDC) yw technoleg AWB, sy'n cymharu ffrwd gamera fyw o wynebau â rhestr wylio a bennwyd ymlaen llaw i ganfod cyfatebiad posibl. Pan gaiff rhybudd ei greu, bydd swyddog yn penderfynu a ddylid siarad â'r unigolyn ai peidio.

Mae dealltwriaeth HDC o'r dechnoleg wedi datblygu'n sylweddol dros y blynyddoedd diwethaf, ac ym mis Awst 2025, nodwyd chwe blynedd ers i rybudd anwir gael ei greu ar gyfer rhywun yn Ne Cymru, er bod technoleg AWB wedi'i defnyddio dros 80 o weithiau yn ystod y cyfnod hwnnw. Hefyd, nid oes yr un unigolyn wedi cael ei arestio ar gam yn Ne Cymru erioed.

Dywedodd y Prif Arolygydd Tony Williams: “Dim ond un o'r tactegau a ddefnyddir i gefnogi ein timau plismona yn y gymdogaeth wrth ymdrin â materion fel dwyn o siopau, difrod troseddol, ac ymddygiad gwrthgymdeithasol yn ein cymunedau yw technoleg Adnabod Wynebau Byw.

“Mae'r achosion hyn o ddefnyddio'r dechnoleg yn rhan o hwb y Warant Plismona yn y Gymdogaeth, gan gynyddu patrolau yn ein cymunedau ac adlewyrchu ein hymrwymiad parhaus i sicrhau bod preswylwyr a busnesau yn teimlo'n ddiogel bob dydd.”

Yn ogystal â thechnoleg Adnabod Wynebau Byw, mae'r cyllid ar gyfer technoleg adnabod wynebau – y daeth llawer ohono drwy grantiau arloesi'r Swyddfa Gartref – hefyd wedi helpu HDC i ddatblygu'r defnydd o Dechnoleg Adnabod Wynebau Ôl-weithredol a Thechnoleg Adnabod Wynebau a Gychwynnir gan Weithredwr.

Mae dros 10,000 o gyfatebiadau bellach wedi'u canfod drwy ddefnyddio technoleg Adnabod Wynebau Ôl-weithredol ar ddelweddau o gamerâu teledu cylch cyfyng, ffonau symudol, a chamerâu cloch drws yn HDC. Mae wedi dwyn cyflawnwyr troseddau yn cynnwys bwrgleriaeth, dwyn, lladrata, ymosod, tresmasu gyda'r bwriad o gyflawni trosedd rywiol, a chamgarcharu gyda'r bwriad o gyflawni trosedd rywiol, i gyfrif.