Dyn o Townhill wedi'i garcharu ar ôl bygwth ymosod â gwydr ar fenyw yr oedd newydd ddechrau fynd ar ddêts â hi

Mae dyn o Abertawe wedi'i garcharu ar ôl bygwth malu gwydr yn wyneb menyw yr oedd ond wedi bod yn mynd ar ddêts â hi ers deg diwrnod.

Anfonodd Ross Milward, sy'n 39 oed o Townhill, negeseuon llais i'w ddioddefwr yn bygwth malu gwydr yn ei hwyneb, difrodi ei cherbyd ac mynd i'w gweithle ac ymosod ar ei chydweithwyr.

Mewn digwyddiad ar wahân, gwnaeth Milward fygwth dyn yn y parc ar Gors Avenue â chyllell. Ar ôl iddo ollwng ei ffôn wrth ffoi o'r safle, cafodd Milward ei adnabod drwy gerdyn banc yng nghas y ffôn.

Plediodd Milward yn euog i anfon neges a oedd yn bygwth marwolaeth neu niwed difrifol yn ogystal ag anfon neges anweddus neu fygythiol ym mis Gorffennaf. Hefyd, newidiodd ei ble ar gyfer cyhuddiad arall o fygwth unigolyn â llafn mewn man cyhoeddus o ddieuog i euog.

Mae wedi cael ei ddedfrydu i ddwy flynedd yn y carchar.

Dywedodd y Ditectif Gwnstabl Thomas Clarke:

"Mae'n amlwg bod Ross Milward yn ddyn treisgar ac nad oes ganddo broblem wrth gyfeirio ei drais at bobl nad yw'n eu hadnabod hyd yn oed.

"Byddai'r profiadau hyn wedi bod yn frawychus iawn i'w ddioddefwyr. Roedd ymddygiad Milward yn gwbl annerbyniol ac nid oes lle i bobl sy'n ymddwyn fel hyn mewn cymdeithas.

"Mae'n dechrau ei gyfnod haeddiannol iawn yn y carchar."