Dyn o Abertawe wedi'i garcharu ar ôl ei arestiad diweddaraf mewn perthynas â chyffuriau Dosbarth A

Mae dyn o Abertawe wedi cael ei garcharu ar ôl pledio'n euog i ymwneud â chyflenwi cyffuriau Dosbarth A eto.

Cafodd Dean Kelshaw, 40 oed o ganol dinas Abertawe, ei stopio a'i chwilio yn y stryd ym mis Mehefin a chanfuwyd bod ganddo swm mawr o arian parod a ffôn symudol a oedd yn derbyn nifer mawr o alwadau ffôn yn ei feddiant. Daethpwyd o hyd i fag yn cynnwys swm mawr o gocên ar y llawr gerllaw.

Plediodd Kelshaw, sydd wedi cael tair euogfarn flaenorol am gyflenwi cyffuriau, yn euog i ymwneud â chyflenwi cocên, bod ag eiddo troseddol yn ei feddiant a bod â chyffur Dosbarth B (canabis) yn ei feddiant.

Cafodd ei ddedfrydu i bum mlynedd ac wyth mis yn y carchar.

Dywedodd y Rhingyll Luke Tucker:

“Nid yw Dean Kelshaw, sydd wedi cael sawl euogfarn flaenorol am yr un troseddau, wedi dangos unrhyw barodrwydd i drawsnewid ei fywyd.

“Bydd y cyffuriau anghyfreithlon yr oedd yn eu gwerthu ar strydoedd Abertawe yn cael effaith ddifrifol ar y sawl sy'n eu defnyddio a'u cymuned ehangach. Nid oedd Dean Kelshaw yn poeni dim am hynny – dim ond am wneud arian yn anghyfreithlon.

“Mae bellach yn dechrau cyfnod hir haeddiannol yn y carchar.”