Digwyddiad codi ymwybyddiaeth o gyllyll Plismona yn y Gymdogaeth ym Mhenarth yn nodi hanner ffordd drwy Fenter Strydoedd Mwy Diogel yr Haf De Cymru

Ers lansio'r Warant Plismona yn y Gymdogaeth yn Ne Cymru, mae Timau Plismona yn y Gymdogaeth wedi gweld cynnydd mewn gweithgarwch i fynd i'r afael â materion fel ymddygiad gwrthgymdeithasol, lladrata, a dwyn o siopau yng nghymunedau Heddlu De Cymru.

Efallai bod ymwelwyr â Phenarth neu'r rhai sy'n byw yno wedi gweld digwyddiad cymunedol dros dro ger Glebe Street a gynhaliwyd gyda Fearless a'r cyngor lleol er mwyn codi ymwybyddiaeth o beryglon cario cyllell, a sut i roi gwybod am bryderon ynghylch arfau. Rhoddwyd cyngor hefyd i bobl a busnesau lleol ar roi gwybod am ymddygiad gwrthgymdeithasol a'r hyn y mae'r Warant Plismona yn y Gymdogaeth newydd yn ei olygu iddynt. Ochr yn ochr â hyn, mae patrolau yn seiliedig ar gudd-wybodaeth sy'n canolbwyntio ar droseddau meddiangar, fel dwyn o siopau, wedi gweld gostyngiad yn nifer y troseddau drwy gydol mis Gorffennaf, a dim ond tri achos a gafwyd yng nghanol y dref drwy gydol y mis.

Mae gweithgarwch tebyg wedi digwydd ledled ardal yr heddlu, a thynnwyd sylw at 10 ardal allweddol gan gynnwys Abertawe, Merthyr Tudful, Pen-y-bont ar Ogwr a Phenarth fel pwyntiau ffocws.

Ym mis Gorffennaf, lansiodd Tîm Plismona yn y Gymdogaeth Merthyr Tudful Brosiect Pili-Pala, sef man diogel peilot fel rhan o'i ymrwymiad i fynd i'r afael â thrais yn erbyn menywod a merched. Mae'r fenter sy'n canolbwyntio ar atal ac sy'n ystyriol o drawma, a anelir at ferched rhwng 13 a 16 oed, wedi'i chynllunio yn benodol i roi cymorth drwy ymyrryd yn gynnar a meithrin hyder y tu allan i ymgysylltu sy'n canolbwyntio ar chwaraeon. Mae'r prosiect yn dod â phartneriaid o'r Tîm Plismona yn y Gymdogaeth, Swyddogion Ymgysylltu â Phobl Ifanc, ac aelodau o staff colegau ynghyd i ymdrin â phynciau ynghylch materion gan gynnwys ymddygiad gwrthgymdeithasol, cydsynio a diogelwch personol, a llinellau cyffuriau.

Mewn mannau eraill, yn sgil ymdrechion tîm Pen-y-bont ar Ogwr drwy Ymgyrch Riella ym mis Gorffennaf gwelwyd 80% yn llai o achosion o ladrata, 44% yn llai o achosion o ymddygiad gwrthgymdeithasol, a 17.1% yn llai o achosion o ddwyn o siopau. Mae'r gostyngiadau hyn wedi cael eu priodoli i ddefnyddio pwerau plismona fel rhybuddion gwarchod y gymuned, gorchmynion atgyfeirio, a gweithgarwch ymgysylltu â phobl ifanc.

Mae'r Tîm Plismona yn y Gymdogaeth yn y Barri hefyd wedi bod yn brysur drwy gydol mis Gorffennaf. Yn dilyn pryderon gan y gymuned y rhoddwyd gwybod i swyddogion amdanynt sy'n gysylltiedig ag ymchwiliadau parhaus, mae'r tîm wedi gweithio'n agos gydag ysgolion uwchradd

er mwyn cynnig cymorth i ddisgyblion, staff, a'r gymuned ysgol ehangach. At hynny, cyflwynwyd naw atgyfeiriad ymddygiad gwrthgymdeithasol ar gyfer Holton Road a'r ardaloedd cyfagos, gan ganolbwyntio ar faterion fel camddefnyddio e-feiciau ac ymddygiad niwsans gan bobl ifanc.

Dywedodd y Prif Arolygydd Tony Williams:

“Mae'r Timau Plismona yn y Gymdogaeth ar draws Heddlu De Cymru wedi bod yn gweithio'n galed iawn, ynghyd ag awdurdodau lleol a phartneriaid, er mwyn gwneud canol ein trefi yn fwy diogel yn unol â'r Fenter Haf Mwy Diogel.

“Hoffwn atgoffa trigolion a busnesau bod gan bob cymuned swyddog penodol y gellir cysylltu ag ef ar gyfer eu hardal sy'n ei alluogi i gysylltu, ymgysylltu â'r timau lleol, a chael y wybodaeth ddiweddaraf am faterion a blaenoriaethau lleol.”