Ymgyrch Diogelwch Ffyrdd Cymru yn tynnu sylw at y risg gynyddol i feicwyr modur

Mae Cymru â'i golygfeydd godidog a'i rhwydwaith ffyrdd amrywiol yn denu beicwyr modur o bell ac agos.

Er bod ffyrdd Cymru ymysg y rhai mwyaf diogel yn y byd, mae beiciwr modur 58 gwaith yn fwy tebygol o gael ei ladd neu ei anafu'n ddifrifol mewn gwrthdrawiad na pherson sy'n teithio mewn car neu dacsi. Felly, mae lleihau nifer y beicwyr modur sy'n cael eu hanafu neu eu lladd yng Nghymru yn dal yn flaenoriaeth.

Cafodd 536 o feicwyr modur eu hanafu yn ôl cofnodion yr heddlu yn 2023, gyda 268 o'r rheini yn cael eu lladd neu eu hanafu'n ddifrifol.

Er mwyn mynd i'r afael â'r risg anghymesur hon, mae Diogelwch Ffyrdd Cymru wedi cyhoeddi'r cyngor canlynol i feicwyr modur a modurwyr eraill:

Cyngor i feicwyr

• Reidiwch yn ofalus tu hwnt ac o fewn y gyfraith bob amser.

• Gall hyd yn oed y beiciwr modur fwyaf profiadol gael budd o gymryd rhan mewn hyfforddiant ar ôl eu prawf neu gael asesiad o'u reidio. Rydym felly yn annog beicwyr modur i fanteisio ar y cyfleoedd sydd ar gael ledled Cymru – nifer ohonynt wedi'u hariannu gan Lywodraeth Cymru – er mwyn gwella eu sgiliau reidio a'u gwybodaeth.

• Mae paratoi cyn pob taith yn allweddol i'ch diogelwch. Archwiliwch eich offer a'ch beic yn ofalus er mwyn gwneud yn siŵr bod popeth yn gweithio'n iawn, gan dalu sylw arbennig i gyflwr eich teiars, breciau a goleuadau - gallai achub eich bywyd. Mae hefyd yn bwysig eich bod yn gwneud yn siŵr eich bod wedi paratoi'n drylwyr; peidiwch byth â reidio pan fyddwch yn ddig, neu dan ddylanwad alcohol neu gyffuriau.

Cyngor i yrrwyr eraill

• Gall gyrwyr chwarae eu rhan drwy gymryd mwy o bwyll wrth gadw llygaid allan am yrwyr modur, yn arbennig wrth adael cyffyrdd, newid lôn neu wrth agor eu drysau – efallai na fydd beic modur mor weladwy â cherbydau mwy o faint a gallant fod yn y lle rydych yn bwriadu symud iddo.
• Dylech edrych yn ofalus yn eich man dall bob amser ac edrych ddwywaith am feiciau modur.

Er bod y mwyafrif llethol o feicwyr modur yn dangos safon da wrth reidio, mae lleiafrif bach yn dewis defnyddio'r ffyrdd mewn ffordd anghyfrifol, gan beri risg diangen iddyn nhw eu hunain ac i ddefnyddwyr eraill. Bydd heddluoedd ledled Cymru yn targedu'r unigolion hyn, gan roi neges glir na chaiff ymddygiad reidio gwael na gwrthgymdeithasol eu goddef.

Mae partneriaid Diogelwch Ffyrdd Cymru yn rhannu'r un nod – bod trigolion ac ymwelwyr a ddaw i Gymru yn defnyddio'r ffyrdd yn gyfrifol ac yn cyrraedd adref yn dd ddiogel.

Am fwy o wybodaeth ewch i walesbybike.com