Siop dros dro yn nodyn atgoffa iasol o gost bosibl y Nadolig i chi

Mae'r arddangosfa o eitemau yn adrodd straeon o droseddau a gyflawnwyd dros y Nadolig.

Agorodd Heddlu De Cymru siop dros dro yng Nghanolfan Siopa'r Cwadrant, Abertawe, gan roi cyfle i aelodau o'r cyhoedd weld eitemau'n cael eu harddangos yn seiliedig ar straeon go iawn, ac i siarad â swyddogion am gyngor atal troseddau dros yr ŵyl. 

Agorwyd y siop dros dro fel rhan o ymgyrch “Cost y Nadolig” sy'n archwilio canlyniadau posibl costau troseddau i chi. Boed yn golled bywyd, yn gar wedi'i ddifrodi'n llwyr, yn fenyw llawn ofn, neu'n ddedfryd yn y carchar, mae'r heddlu yn codi ymwybyddiaeth o'r gost wirioneddol bosibl, pe baech yn cyflawni trosedd. 

Mae Cost y Nadolig yn lleoliad y mae swyddogion yn annog pobl i ymweld ag ef dros fis Rhagfyr, er mwyn dysgu o straeon go iawn sydd wedi digwydd dros gyfnod y Nadolig i bobl yn Ne Cymru a'r gost i'r troseddwr a'r dioddefwyr. 

Dywedodd yr Arolygydd Plismona yn y Gymdogaeth ar gyfer Canol Abertawe, Andrew Hedley:

“Yr adeg hon o'r flwyddyn, mae llawer ohonom yn allan yn mwynhau ein hunain ac yn prynu anrhegion ar gyfer ffrindiau a theulu, ond yn anffodus nid yw hyn yn wir i bawb dros y Nadolig. 

“Drwy agor ein siop dros dro, rydym yn gobeithio codi ymwybyddiaeth o droseddau rydym yn eu gweld dros y Nadolig, gan gynnwys cam-drin domestig, gyrru dan ddylanwad alcohol/cyffuriau, trais sy'n gysylltiedig â'r economi liw nos, sgamiau, a throseddau meddiangar. 

“Rydym am i bobl feddwl ddwywaith am gyflawni'r troseddau hyn a dangos y canlyniadau drwy ddangos cost bosibl troseddau i chi. Gwyddom hefyd y bydd rhai pobl yn wynebu risg o gael eu cam-drin neu fath arall o droseddu, felly mae'n bwysig ein bod yma i roi cyngor diogelwch.” 

Bydd ein partneriaid yn Nhîm Diogelwch Cymunedol Cyngor Dinas Abertawe hefyd yn bresennol dros fis Rhagfyr. Bydd amrywiaeth o sefydliadau partner Abertawe Mwy Diogel yn bresennol ac yn barod i siarad â siopwyr y Nadolig ac ateb unrhyw bryderon diogelwch a all fod ganddynt. 

Dywedodd Hayley Gwilliam, Aelod o Gabinet Cyngor Abertawe ar gyfer Cymorth Cymunedol: “Rydym yn falch iawn o ymuno â Heddlu De Cymru wrth gyfri'r diwrnodau i'r Nadolig. 

“Drwy bwysleisio effaith cyflawni troseddau yr adeg hon o'r flwyddyn ynghyd â'r hyn y gallwch ei wneud i atal hyn, rydym yn gobeithio y bydd mwy fyth ohonom yn ddiogel ac yn hapus dros gyfnod yr ŵyl.” 

Bydd y siop dros dro wedi'i staffio gan swyddogion yn ystod oriau agor, a fydd yn hapus i siarad ag unrhyw un sydd â phryderon. Bydd hefyd ymweliadau gan adrannau Heddlu De Cymru gan gynnwys Uned Plismona'r Ffyrdd, Cŵn Llesiant yr Heddlu, y Tîm Seiberdroseddu, a'r Tîm Ymchwilio i Achosion o Dreisio.

Bydd y siop ar agor o ddydd Gwener 29 Tachwedd i ddydd Mawrth 24 Rhagfyr bob dydd rhwng 10.00am a 4.00pm. Gellir dod o hyd iddi gyferbyn â WHSmith ger mynedfa Stryd Nelson.