Carcharu deliwr wedi'i ddal yn gwerthu cyffuriau ar gyfnod prawf

Anfonodd Jay Murray filoedd o negeseuon testun yn cynnig crac cocên a heroin o fewn un wythnos – er ei fod eisoes ar gyfnod prawf am droseddau yn ymwneud â chyffuriau.

Roedd y dyn 24 oed o Lanilltud Fawr yn defnyddio fflat rhywun arall ger Salisbury Road, Caerdydd, fel safle i ddelio cyffuriau – gan gamfanteisio ar y deiliad a oedd yn dioddef o ganser ar y pryd.

Gwnaeth swyddogion o Uned Troseddau Cyfundrefnol Caerdydd a'r Fro ganfod fod y llinell cyffuriau yr oeddent yn ymchwilio iddi yn cyfateb i'r rhif ffôn symudol a ddefnyddiwyd gan Murray yn y gorffennol er mwyn cysylltu â swyddogion yr heddlu a swyddogion y gwasanaeth prawf ar ôl cael ei ryddhau o'r carchar. Gwnaethant arestio Murray ar 2 Hydref 2023 ger y fflat yr oedd yn ei ddefnyddio, ac yn ystod chwiliad o'r eiddo, daeth swyddogion o hyd i grac cocên, cocên, canabis a £1,738 mewn arian parod.

Cafodd Murray ei gyhuddo o ymwneud â chyflenwi heroin a chrac cocên, meddu ar grac cocên gyda'r bwriad o'i gyflenwi, a meddu ar eiddo troseddol (arian parod). Plediodd yn euog i'r holl droseddau ac ymddangosodd gerbron Llys y Goron Caerdydd ddydd Mawrth 5 Tachwedd i gael ei ddedfrydu.

Hwn oedd y trydydd euogfarn Murray am ddelio cyffuriau sy'n ddedfryd orfodol o saith mlynedd, ond cafodd ddisgownt am bledio'n euog yn gynnar a chafodd ei garcharu am bum mlynedd a chwe mis.