Gorchymyn Gwahardd i gefnogwr pêl-droed a daflodd ddarnau o arian at gefnogwyr y tîm arall

Mae cefnogwr pêl-droed wedi cael Gorchymyn Gwahardd Pêl-droed yn dilyn digwyddiad yn Stadiwm Swansea.com.

Cafodd Sam Bright, o Bentwyn, Caerdydd ei arestio am drosedd trefn gyhoeddus yn y gêm rhwng Dinas Abertawe a Dinas Caerdydd yn Stadiwm Swansea.com y tymor hwn.

Tuag at ddiwedd y gêm, cafodd y dyn 46 oed ei weld yn taflu darnau o arian at gefnogwyr Dinas Abertawe o ardal y cefnogwyr oddi cartref.

Ar 11 Medi, ymddangosodd gerbron Llys Ynadon Abertawe a phlediodd yn euog i dorri Deddf Pêl-droed (Troseddau) 1991 (Taflu taflegrau at ardal gyfagos i'r cae) a chafodd Orchymyn Gwahardd Pêl-droed am dair blynedd.

Fel rhan o'r gorchymyn, mae Bright wedi cael ei atal rhag mynd i unrhyw gemau o fewn y DU a thramor, a bydd hefyd yn gorfod ildio ei basbort i'r Heddlu cyn pob gêm Cymru oddi cartref.

Mae hefyd wedi ei wahardd rhag mynd i unrhyw dref neu ddinas lle mae Clwb Pêl-droed Dinas Caerdydd neu dîm Cymru yn chwarae.

Dywedodd PC Christian Evans o Heddlu De Cymru: “Fe wnaeth y mwyafrif helaeth o'r bobl a fynychodd Stadiwm Swansea.com ymddwyn yn gyfrifol a mwynhau profiad diogel.

“Fodd bynnag, os oes tystiolaeth o anrhefn yn gysylltiedig â phêl-droed, rydym bob amser yn ceisio dod o hyd i'r rheini sy'n gyfrifol er mwyn cymryd y camau priodol.

“Rwy'n gobeithio y bydd y canlyniad llys hwn yn cyfleu neges glir na chaiff ymddygiad tebyg ei oddef yn Stadiwm Swansea.com.”