Saith aelod o grŵp troseddau cyfundrefnol wedi'u cyhuddo o droseddau cyffuriau

Mae Ymgyrch Flueggea yn ymchwiliad rhagweithiol i Grŵp Troseddau Cyfundrefnol yng Nghaerdydd sy'n mewnforio ac yn dosbarthu canabis ar raddfa eang. Arweiniwyd yr ymgyrch gan Tarian, sef Uned Troseddau Cyfundrefnol Ranbarthol de Cymru.

Ar 9 Rhagfyr 2024, gweithredodd Tarian nifer o warantau ledled Caerdydd a'r Barri gyda chymorth Heddlu De Cymru a'r Heddlu Trafnidiaeth Prydeinig. Cafodd y canlynol eu harestio a'u cyhuddo o gynllwynio i fewnforio cyffur rheoledig Dosbarth B gyda'r bwriad o osgoi gwaharddiad / cyfyngiad; cynllwynio i gyflenwi cyffur rheoledig Dosbarth B – canabis a bod â chyffur rheoledig Dosbarth B – canabis yn eu meddiant gyda'r bwriad o'i gyflenwi.

Yr unigolion yw:

Abubakr Khawar, 28 oed, o Lanyrafon, Caerdydd

Mohammed Nurul Hussain, 28 oed, o Lanyrafon, Caerdydd

Sophie Jones, 32 oed, o'r Sblot, Caerdydd

Keiron Jones, 28 oed, o'r Eglwys Newydd, Caerdydd

Solomon Bertram, 35 oed, o Lanisien, Caerdydd

Steven Munroe, 44 oed, o'r Sblot, Caerdydd

Cafodd Sean Montgomery, 23 oed o Dredelerch, Caerdydd ei gyhuddo o gynllwynio i fewnforio cyffur rheoledig Dosbarth B gyda'r bwriad o osgoi gwaharddiad / cyfyngiad a chynllwynio i gyflenwi cyffur rheoledig Dosbarth B – canabis.

Ymddangosodd pob un o'r saith gerbron y Llys yr wythnos hon. Mae'u hymddangosiad nesaf wedi'i drefnu ar gyfer dydd Mercher 6 Ionawr.

Fel rhan o gamau gorfodi pellach, daeth swyddogion o hyd i oddeutu £25,000 mewn arian parod.

Dywedodd y Ditectif Gwnstabl Sean Meyrick o Tarian:

“Rwy'n annog perthnasau unigolion sy'n agored i niwed i siarad â'u hanwyliaid a'u rhybuddio o beryglon derbyn nwyddau ar ran dieithriaid.

“Nid dim ond oedolion sy'n agored i niwed sydd wedi cael eu targedu. Rydym wedi gweld bod myfyrwyr a phobl ifanc wedi cael cynnig y cyfle i wneud arian cyflym.

“Rwy'n rhybuddio unrhyw un sy'n ystyried derbyn arian gan rywun nad ydynt yn ei adnabod, derbyn parseli yn eu cyfeiriad cartref ar ran y person, i feddwl am y canlyniadau posibl. Mae'n hynod debygol y bydd y parseli yn cynnwys nwyddau anghyfreithlon, fel cyffuriau, a thrwy ganiatáu i'ch cyfeiriad gael ei ddefnyddio, gallech wynebu cyhuddiadau troseddol a / neu ganlyniadau addysgol, fel cael eich gwahardd o'ch cwrs.”