Carcharu bwrgler o Gaerdydd diolch i apêl ar y cyfryngau cymdeithasol a thechnoleg Adnabod Wynebau Ôl-weithredol.

 

Torrodd y bwrgler, Jamie Laver, i mewn i gartrefi a fflatiau yn ardaloedd y Rhath a'r Sblot.

Gwnaeth ddwyn teledu 72 modfedd o lety myfyrwyr a gemwaith o werth personol o gartref mam-gu.

Ond daeth ei sbri troseddol i ben pan gafodd ei adnabod drwy'r cyfryngau cymdeithasol a thechnoleg Adnabod Wynebau Ôl-weithredol.
Cafodd Laver ei ddal ar Gamera Teledu Cylch Cyfyng mewn Co-op ar Ffordd Sblot yn defnyddio cerdyn banc o fwrgleriaeth funudau yn gynharach ar 22 Ebrill 2024.

Roedd ei hunaniaeth yn anhysbys, felly ym mis Mai 2024, gwnaeth ditectifs droi at ein dilynwyr Facebook i gael cymorth.

Gwnaeth sawl unigolyn enwi Laver, a oedd yn hysbys i Heddlu Avon a Gwlad yr Haf, fel yr unigolyn dan amheuaeth a gwnaeth y dechnoleg Adnabod Wynebau Ôl-weithredol gadarnhau'r gyfatebiaeth.

Cafodd Laver ei arestio a'i gyhuddo, ac yn ddiweddarach plediodd yn euog i bum bwrgleriaeth, difrod troseddol, a lladrata.

Dedfrydwyd y dyn 30 oed yn Llys y Goron Caerdydd ddydd Iau, 12 Rhagfyr i 28 mis yn y carchar.
Mae un o'i ddioddefwyr, gwraig 68 oed o'r Sblot, wedi disgrifio effaith y fwrgleriaeth.“Ers y fwrgleriaeth, rwy'n cael trafferth cysgu, rwy'n deffro ac yn cael ôl-flachiadau lle byddaf yn dechrau meddwl am y fwrgleriaeth. Byddaf yn mynd i banig, ac yn poeni y gallai rhywun fod wedi brifo'n ddifrifol neu, yn waeth, gallai ddigwydd eto.”

Dywedodd y Ditectif Gwnstabl Matthew Evans, o Heddlu De Cymru: “Byddwn yn defnyddio'r holl dechnoleg sydd ar gael, yn cynnwys Adnabod Wynebau Ôl-weithredol a'r cyfryngau cymdeithasol i adnabod a dwyn troseddwyr o flaen eu gwell, fel y mae'r achos hwn yn ei ddangos.
“Diolch i bawb sydd wedi cysylltu â gwybodaeth.
"Gobeithio y bydd canlyniad ein hymchwiliad yn rhoi rhywfaint o gysur i'r dioddefwyr, yn arbennig y wraig o Sblot a'i theulu, ac yn rhoi tawelwch meddwl i'r gymuned ehangach o'n hymrwymiad i ymchwilio i fwrgleriaethau.”

 

Pennawd: Gwnaeth aelodau o'r cyhoedd adnabod Laver o'r llun hwn o ddeunydd Teledu Cylch Cyfyng a gafodd ei ddefnyddio fel rhan o apêl am wybodaeth ar y cyfryngau cymdeithasol.