Aelodau grŵp troseddau cyfundrefnol yn y Rhondda yn cael eu dedfrydu i dros 70 o flynyddoedd o garchar

 

Mae chwe unigolyn arall wedi cael eu dedfrydu am fod yn rhan o grŵp troseddau cyfundrefnol a oedd yn cael ei redeg gan ddau frawd yn y Rhondda.

Cafodd Thomas Davies, 38 oed, a Jack Davies, 37 oed, y ddau ohonynt o Buckley Road, Trealaw, eu carcharu yn gynharach yn y flwyddyn.

Ddydd Gwener 21 Mehefin, cafodd y chwe diffynnydd a oedd yn weddill eu dedfrydu yn Llys y Goron Casnewydd i gyfanswm o 37 o flynyddoedd a 10 mis.

Mae cyfanswm o naw diffynnydd bellach wedi cael eu dedfrydu i gyfanswm o 71 o flynyddoedd a phum mis am eu rolau mewn cynllwyn teuluol ar raddfa fawr i gyflenwi cocên.

Dechreuodd y broses o roi terfyn ar eu hymgyrch anghyfreithlon ar 23 Gorffennaf 2020, pan gafodd Gavin Etchell ei stopio gan yr heddlu ar yr A40 yn Nhrefynwy am fater gwahanol. Dangosodd data a lawrlwythwyd o'r dyfeisiau a atafaelwyd ganddo ar y pryd, ei fod yn cyflenwi cocên ar ran Thomas Davies.

Ar 9 Chwefror 2021, gweithredodd swyddogion nifer o warantau chwilio yn targedu'r brodyr Davies, gan ddatgelu ffatri gyffuriau a oedd yn gweithredu o garej ar Partridge Road, Trealaw. Atafaelwyd dros ddau gilogram o gocên, 50 cilogram o gyfrwng torri, cywasgyddion cyffuriau hydrolig a pheiriannau cymysgu. Roedd y garej yn cael ei rentu gan Thomas a Jack am £50 y mis a oedd yn cael ei hwyluso gan eu tad, Byron Davies.

 

Mater teuluol:

• Trefnodd Thomas Davies brynu sawl cilogram o gocên gan nifer o ffynonellau gwahanol a oedd yn cael eu danfon i Dde Cymru gan gludwyr ar ei gais. Yna, ychwanegwyd sylweddau eraill at y cyffuriau hyn i wneud cocên llai pur cyn eu gwerthu mewn symiau amrywiol o gilogramau i gramau.
• Chwaraeodd rhieni Thomas a Jack - Jacqueline Davies, 59 oed a Byron Davies, 66 oed - rolau pwysig wrth wyngalchu symiau mawr o arian troseddol i'w meibion. Atafaelwyd dros £57,000 mewn arian parod o sêff y daethpwyd o hyd iddi yn eiddo Byron Davies.
• Roedd partner Thomas, Nicole Locke, 31 oed, yn gweithredu fel deliwr ar y stryd ar gyfer y Grŵp Troseddau Cyfundrefnol, gan ddelio â'r cwsmeriaid “gram” o ddydd i ddydd. Roedd Nicole hefyd yn troi'r cocên yn grac cocên gan ddefnyddio proses a elwir yn “olchi”. 
• Roedd Christopher Adams, 39 oed, Scott Alway, 35 oed a Steven Evans, 38 oed, yn gweithredu fel cludwyr i'r Grŵp Troseddau Cyfundrefnol hwn, gan deithio ledled y wlad i gasglu nifer o gilogramau o gocên er mwyn ei werthu ymlaen yn ardal De Cymru. Pan arestiwyd Steven Evans, daeth swyddogion o hyd i £23,000 mewn arian parod mewn sêff a datgelodd ymholiadau fod ganddo hefyd dros £50,000 mewn arian parod anesboniadwy yn ei gyfrifon banc.
• Roedd Gavin Etchell, 42 oed, hefyd yn gweithredu fel cludwr cyn cael ei arestio ym mis Gorffennaf 2020, ond roedd hefyd yn ddeliwr stryd lefel uchel, gan gyflenwi “ownsys” o gocên i ddelwyr stryd lleol.

 

Cawsant eu dedfrydu ddydd Gwener 21 Mehefin

 

Jacqueline Davies, 59 oed, o Buckley Road, Trealaw, Tonypandy – 2 flynedd

• Ymwneud â chynnig cyflenwi cocên 
• Gwneud trefniant/dod yn rhan o drefniant i hwyluso cael gafael ar eiddo troseddol neu reoli eiddo o'r fath

Byron Davies, 66 oed, o Heol Trecastell, Caerffili – Blwyddyn a 7 mis wedi'i gohirio am 2 flynedd

• Gwneud trefniant/dod yn rhan o drefniant i hwyluso cael gafael ar eiddo troseddol neu reoli eiddo o'r fath (Sefydlu cwmni cragen – Valley Self Storage i wyngalchu'r enillion)

Scott Headley Alway, 35 oed, o Heather Close, Trealaw, Tonypandy – 9 mlynedd

• Cynllwynio i gyflenwi cocên 

Steven John Evans, 38 oed, o Trealaw Road, Trealaw, Tonypandy – 8 mlynedd a 9 mis (ynghyd â blwyddyn i gydredeg)

• Cynllwynio i gyflenwi cocên
• Meddu ar eiddo troseddol

Gavin Hayward Etchell, 42 oed, yn CEF y Parc ar hyn o bryd – 8 mlynedd

• Cynllwynio i gyflenwi cocên
• Methu â chydymffurfio â Gorchymyn Atal Troseddau Difrifol

Christopher Adams, 39 oed, o Kenry Street, Tonypandy – 8 mlynedd a 6 mis

• Cynllwynio i gyflenwi cocên

 

Dedfrydwyd yn flaenorol

 

Thomas Davies, 38 oed, o Buckley Road, Trealaw, Tonypandy – 16 mlynedd (ynghyd â 8 mlynedd i gydredeg)

• Cynllwynio i gyflenwi cocên
• Cynllwynio i gyflenwi crac cocên
• Gwneud trefniant/dod yn rhan o drefniant i hwyluso cael gafael ar eiddo troseddol neu reoli eiddo o'r fath (Sefydlu cwmni cragen – Valley Self Storage i wyngalchu'r enillion) – 2 flynedd i gydredeg.

 Jack Davies, 37 oed, o Buckley Road, Trealaw, Tonypandy – 13 blynedd a 7 mis (ynghyd â 6 blynedd i gydredeg)

• Cynllwynio i gyflenwi cocên
• Cynllwynio i gyflenwi crac cocên
• Gwneud trefniant/dod yn rhan o drefniant i hwyluso cael gafael ar eiddo troseddol neu reoli eiddo o'r fath (Sefydlu cwmni cragen – Valley Self Storage i wyngalchu'r enillion) – 2 flynedd i gydredeg.

Nicole Caroline Locke, 31 oed, o Pergwm Street, Trealaw, Tonypandy

• Cynllwynio i gyflenwi cocên – 2 flynedd wedi'i gohirio am 2 flynedd.
• Cynllwynio i gyflenwi crac cocên – 2 flynedd wedi'i gohirio am 2 flynedd.

 

Dywedodd y Ditectif Gwnstabl Lewis Watkins:

“Roedd pob un o'r naw aelod yn bobl allweddol yn y gadwyn cyflenwi cyffuriau hon ac rwyf mor falch ein bod wedi gallu eu dedfrydu am eu troseddau a sicrhau nad ydynt bellach yn rhan o'n cymunedau.

“Mae'r dedfrydau sydd wedi'u cyflwyno yn anfon neges gref nad oes gan gyffuriau na grwpiau troseddau cyfundrefnol unrhyw le yn ein cymunedau. Nid yn unig rydym wedi gallu amharu ar y grŵp troseddau cyfundrefnol hwn a'i weithredoedd, rydym hefyd wedi gallu tynnu swm sylweddol o gyffuriau oddi ar y strydoedd.

“Mae Heddlu De Cymru yn ymrwymedig i amddiffyn ein cymunedau ac mae llwyddiant yr ymgyrch hon yn dangos y byddwn yn defnyddio pob tacteg angenrheidiol i dargedu grwpiau troseddau cyfundrefnol a'r rhai sy'n ymgymryd â gweithgarwch llwgr, twyll a gwyngalchu arian."