Mae dyn o Gofentri a ddefnyddiodd Snapchat i feithrin perthynas amhriodol â merch ysgol o Gaerdydd, ac i gamfanteisio'n rhywiol arni, wedi cael ei garcharu

Gyrrodd Patryk Kantor 120 o filltiroedd i gwrdd â'r ferch mewn parc yn agos at ei chartref, a'i gyrru i eiddo Airbnb.

Yn y sgyrsiau ar-lein, roedd wedi esgus ei fod yn 17 oed ond mewn gwirionedd roedd yn 25 oed.

Mam y ferch a hysbysodd yr heddlu, gan ei bod yn poeni am sylwadau a wnaed ganddi.

Cafodd Kantor ei arestio ar 28 Mawrth 2024, deuddydd ar ôl yr alwad gychwynnol i'r heddlu.

Cafodd ei adnabod a'i arestio diolch i ymholiadau CCTV a gwiriadau adnabod rhifau ceir yn awtomatig a gynhaliwyd ar ei gerbyd.

Plediodd yn euog i ddau achos o weithgarwch rhywiol â phlentyn, achosi ac annog plentyn i gymryd rhan mewn gweithgarwch rhywiol, a chwrdd â phlentyn ar ôl meithrin perthynas amhriodol â'r plentyn hwnnw.

Cafodd ei ddedfrydu yn Llys y Goron Caerdydd ddydd Gwener 14 Mehefin i gyfnod o bum blynedd yn y carchar. Mae hefyd yn destun Gorchymyn Atal Niwed Rhywiol a bydd yn rhaid iddo gydnabod ei hun fel Troseddwr Rhyw Cofrestredig am oes.

Dywedodd y Ditectif Gwnstabl Anna Chad Nixon, o Heddlu De Cymru:

“Hoffwn ganmol mam y ferch a weithredodd ar ei hamheuon ac a hysbysodd yr heddlu.
“Dylai'r achos hwn, ac achosion tebyg eraill, atgoffa pawb bod rheibwyr ar-lein sy'n targedu plant.
“Mae ymwybyddiaeth o ddiogelwch ar-lein mor bwysig, ac mae gan bawb rôl i'w chwarae. 
“Os ydych yn amau bod unigolyn yn cael ei dargedu gan rywun ar-lein at bwrpas meithrin perthynas amhriodol ag ef, rhowch wybod am hynny yn syth.”

Mae meithrin perthynas amhriodol ar-lein yn drosedd. Os ydych yn amau bod unigolyn yn cael ei dargedu gan rywun ar-lein at bwrpas meithrin perthynas amhriodol ag ef, hyd yn oed os nad ydych yn siŵr, dywedwch wrth rywun.

I gael help a chyngor a gwybodaeth am adnabod arwyddion meithrin perthynas amhriodol, ewch i: https://www.south-wales.police.uk/cy-GB/cyngor/cyngor-a-gwybodaeth/gr/meithrin-perthynas-amhriodol/