Dau wedi'u carcharu am gyflenwi cyffuriau ym Mhen-y-bont ar Ogwr

Dedfrydwyd dau ddyn ddydd Gwener ddiwethaf, 7 Mehefin yn Llys y Goron Casnewydd am dros 15 mlynedd am gyflenwi cyffuriau ym Mhen-y-bont ar Ogwr. Cafodd y ddau eu cael yn euog o gyflenwi cyffuriau dosbarth A, Cocên ameddu ar gyffuriau dosbarth A a B gyda'r bwriad o'u cyflenwi.

• Dedfrydwyd Owen Christopher Morgan, 29 oed, o Ffordd Y Chwarel, Mynydd Cynffig i ddeng mlynedd yn y carchar.
• Dedfrydwyd Rhys John Cox, 31 oed oedd heb gartref sefydlog i bum mlynedd ac wyth mis yn y carchar.

Brynhawn ddydd Gwener Rhagfyr 15, 2023, nodwyd cerbyd oedd yn gysylltiedig ag Ymgyrch Falmouth yn dychwelyd o Lerpwl i Dde Cymru. Roedd y cerbyd yn destun stop gorfodol gan swyddogion.

Cafodd Rhys Cox, y gyrrwr, ei ddal i ddechrau wrth i swyddogion gynnal chwiliad o'r cerbyd ac yn ystod y chwiliad hwnnw canfuwyd 10 cilo o gocên.

 

 

Cynhaliwyd ymholiadau am y cerbyd, yn ogystal â chwiliadau dilynol o'r safleoedd a oedd yn gysylltiedig â Rhys Cox ac Owen Morgan. Arweiniodd hyn at adfer mwy o gyffuriau dosbarth A yn ogystal â swm o gyffuriau Dosbarth B, canabis a gwasg hydrolig a mowldiau maint cilo.

Dywedodd y Ditectif Ringyll Geoff Banks:

"Un o achosion Uned Ymchwiliadau Cudd yw Ymgyrch Falmouth yn ymchwilio i gyflenwi a dosbarthu cyffuriau Dosbarth A yn rhanbarth De Cymru.

"Rwy'n gobeithio y bydd y dedfrydau hyn yn gweithredu i atali eraill ac yn rhoi rhywfaint o sicrwydd i'r cyhoedd y byddwn yn ymchwilio i bob gweithgarwch sy'n ymwneud â chyffuriau yn drylwyr er mwyn dwyn troseddwyr gerbron eu gwell a diogelu ein cymunedau rhag niwed.

"Mae cyffuriau anghyfreithlon yn peri gofid nid yn unig i'r rhai sy'n eu defnyddio, ond hefyd i'r gymuned leol."