Ymgyrch Medusa yn arwain at nifer fawr o arestiadau sy'n gysylltiedig â chyffuriau yn Abertawe a Chastell-nedd Port Talbot

 

Lansiodd swyddogion Heddlu De Cymru, gan weithio'n agos â Heddlu Glannau Mersi, ymgyrch y mis hwn i fynd i'r afael â masnachu cyffuriau yn Abertawe a Chastell-nedd Port Talbot.

Cafodd y fenter dan arweiniad cudd-wybodaeth – dan y ffugenw Medusa – ei sefydlu i fynd i'r afael â Llinellau Cyffuriau – gangiau troseddol sy'n cyflenwi cyffuriau gan ddefnyddio llinellau ffonau symudol penodol yn ardaloedd Abertawe a Chastell-nedd Port Talbot.

Cafodd camau gorfodi eu cymryd yn ardaloedd Abertawe a Chastell-nedd ar 10 ac 11 Medi, gan arwain at y canlyniadau canlynol:

• roedd 5 Llinell Cyffuriau Negeseuon Swmpus yn destun camau gorfodi.

• arestio 24 o unigolion am droseddau yn ymwneud â chyffuriau, gan gynnwys cyflenwi, gyda chyfanswm o 13 o gyhuddiadau hyd yma gyda sawl ymchwiliad yn parhau.

• atafaelu 4 arf, gan gynnwys 3 eitem lafnog.

• atafaelu 10 o gerbydau

• atafaelu arian parod gwerth £3,000

• atgyfeirio un plentyn at wasanaethau Diogelu am ei fod yn wynebu risg o niwed.

• atafaelu 48 o ffonau symudol oddi ar droseddwyr yr amheuwyd eu bod yn gysylltiedig â chyflenwi cyffuriau.

• atafaelu gwerth dros £5000 o gyffuriau gan gynnwys heroin a chrac cocên.

 

Dywedodd y Prif Dditectif Arolygydd Marc Gardner:

"Mae'r niferoedd yn dangos graddfa'r broblem sy'n effeithio ar gymunedau yn Ne Cymru, ac mae ein hymdrechion i nodi a chosbi'r rhai sy'n achosi niwed ac i ddiogelu'r rhai sy'n wynebu risg yn parhau.

"Mae cyffuriau a throseddau sy'n gysylltiedig â chyffuriau yn hynod niweidiol i'n cymunedau, ac mae ymgyrchoedd fel hon yn hanfodol er mwyn targedu'r rhai sy'n gyfrifol.

"Mae Ymgyrch Medusa yn ymgyrch ragweithiol uwch sy'n ymrwymedig i fynd i'r afael â rhwydweithiau llinellau cyffuriau sy'n gweithredu yn Abertawe a Chastell-nedd Port Talbot a'r cyffiniau sy'n parhau i reoli cyffuriau anghyfreithlon a chamfanteisio ar bobl sy'n agored i niwed i wneud elw yn anghyfreithlon, a tharfu ar y rhwydweithiau hyn.

"Mae adnoddau arbenigol wedi cael eu defnyddio i fynd ar ôl unigolion yn ddiflino gyda'r bwriad o arestio unigolion dan amheuaeth, gwaredu cyffuriau a reolir oddi ar y strydoedd a nodi unrhyw sianeli er mwyn tarfu ar y rhai sy'n recriwtio unigolion sy'n agored i niwed ac sydd dan bwysau i gyflawni gweithgarwch o'r fath.

“Rydym wedi gweld drwy Ymgyrch Medusa, bod gweithio ochr yn ochr â heddluoedd eraill yn ein galluogi i rannu gwybodaeth a chudd-wybodaeth i'r eithaf er mwyn targedu troseddwyr, diogelu pobl sy'n agored i niwed ac atal niwed pellach."

Dywedodd yr Arolygydd Stephen Morris o Heddlu Glannau Mersi:

“Mae Prosiect Medusa, tîm llinellau cyffuriau ymroddedig Glannau Mersi, yn parhau i weithio'n agos gyda heddluoedd ac asiantaethau eraill i dargedu Llinellau Cyffuriau ac amddiffyn pobl sy'n agored i niwed.

“Mae'r ymgyrch hon yn Ne Cymru yn dangos y byddwn yn mynd ati'n ddiflino i dargedu'r grwpiau troseddau hynny sy'n cyflenwi cyffuriau ledled y wlad, yn camfanteisio ar bobl sy'n agored i niwed yn ein cymunedau ac yn cymryd rhan mewn ymddygiad troseddol difrifol megis trais, camfanteisio a cham-drin.

"Bydd ein gwaith i gael gwared ar y bobl hyn oddi ar ein strydoedd a'u dwyn i gyfrif yn parhau yn ddyddiol, a byddwn yn gofyn i unrhyw un sydd â gwybodaeth am y math hwn o weithgarwch i gysylltu â'r heddlu er mwyn gweithredu ar hyn."

Ychwanegodd y Ditectif Brif Arolygydd Gardner:

"Ni fyddai'r ymgyrch hon wedi bod yn llwyddiant heb gymorth amrywiaeth eang o bobl eraill yn yr heddlu, gan gynnwys yr Heddlu Trafnidiaeth Prydeinig, y Ganolfan Gwasanaethau Cyhoeddus, Gwasanaethau'r Ddalfa, Dyfodol, Uned Ymchwiliadau Gwyddonol ar y Cyd, Gwasanaethau Cymorth Gweithredol, a'n Timau Plismona yn y Gymdogaeth.

“Diolch i bawb am gyfrannu at Ymgyrch Medusa.”