Carcharu menyw o Benarth am daro a ffoi

Mae menyw 27 oed wedi ei charcharu ar ôl i'r car yr oedd hi'n ei yrru taro beiciwr – a gollodd goes o ganlyniad i'r gwrthdrawiad.

Yn ddiweddarach, gwerthodd Savannah Roberts, o Benarth, ei char mewn ymgais i guddio'i rôl yn y digwyddiad, a ddigwyddodd yn oriau mân ddydd Gwener, Awst 5, 2022.

Tarodd Savannah feiciwr gyda'i Ford Fiesta wrth iddi yrru ar hyd Heol Penarth, Caerdydd. Cwympodd y beiciwr oddi ar ei feic gydag anafiadau difrifol. Stopiodd Savannah a dychwelyd at y dioddefwr ond wedyn gyrrodd i ffwrdd, gan adael y dioddefwr yn gorwedd ar ochr y ffordd yn gofyn am help.

Cafodd y dioddefwr ei gludo i Ysbyty Athrofaol Cymru, ac wedyn i Ysbyty Treforys yn Abertawe, lle yn anffodus bu'n rhaid torri ei goes i ffwrdd. 

Ar ôl y ddamwain, gwerthodd Savannah y car i geisio cuddio unrhyw gysylltiad rhyngddi hi a'r ddamwain, ond yn dilyn gwiriadau teledu cylch cyfyng, gwaith fforensig ac ymholiadau eraill gan swyddogion, cysylltwyd y car â Savannah a chafodd ei harestio ar ôl ei gweld yn gyrru drwy olau coch.

Yn ystod ei chyfweliad, atebodd Savannah bob cwestiwn gyda "dim sylw". Cafodd Savannah Roberts, 27 oed, o Benarth ei charcharu am 3 blynedd a 9 mis am achosi anafiadau difrifol drwy yrru'n beryglus a gwyrdroi cwrs cyfiawnder yn Llys y Goron Caerdydd ddydd Iau 5 Medi 2024.