Gang troseddau cyfundrefnol a oedd wedi'i leol ym Merthyr Tudful wedi'i ddedfrydu

Mae naw dyn a dwy fenyw, a oedd yn aelodau o grŵp troseddau cyfundrefnol, wedi cael eu hanfon i'r carchar am bron i 80 mlynedd mewn gwrandawiad dedfrydu yn Llys y Goron Caerdydd.

Ymgyrch dan arweinyddiaeth Tarian, sef yr Uned Troseddau Cyfundrefnol Ranbarthol ar gyfer de Cymru, oedd Ymgyrch Vemtor, mewn perthynas â grŵp troseddau cyfundrefnol a oedd wedi'i leoli ym Merthyr Tudful ac a oedd yn ymwneud â dosbarthu Heroin a Chocên ar raddfa enfawr ledled de Cymru.

Yn ystod yr ymchwiliad, atafaelwyd bron i 10 cilogram o gocên a 5 cilogram o heroin, gyda gwerth posibl ar y stryd o fwy na £1.5m.

Roedd y grŵp troseddau cyfundrefnol yn cael ei arwain gan ddyn lleol o'r enw Kerry Evans, a oedd yn cael gafael ar ei gyffuriau o Ogledd-orllewin Lloegr. Dangosodd tystiolaeth a gasglwyd yn ystod yr ymchwiliad fod Evans wedi ymwneud â chyflenwi mwy na 150 cilogram o heroin a chocên.

Hefyd, casglwyd tystiolaeth a oedd yn dangos bod Evans wedi brolio iddo gyflenwi tua 600 cilogram o gyffuriau a reolir mewn cyfnod o 12 mis.

Roedd Lloyd Jones, Ricky Griffiths a Christopher Wray yn cael eu cyfarwyddo gan Evans a nhw oedd yn gyfrifol am reoli'r busnes troseddol yn ardal Merthyr Tudful.

Rôl Claire James o fewn y grŵp troseddau cyfundrefnol oedd defnyddio ei chartref fel ‘lle diogel’ er mwyn storio cyffuriau.

Gweithredodd Alex Davies a Leon Owen fel cludwyr gan deithio i Ogledd Lloegr i gludo arian parod ar ran Kerry Evans.

Roedd David Halliwell wedi'i leoli yn ardal Bolton ac yn cludo cyffuriau i dde Cymru. Ar 16 Mawrth 2023, cludodd Halliwell 10 cilogram o gocên i Ferthyr.

Roedd Jason a Heather Flannigan wedi'u lleoli yn ardal Bolton hefyd. Defnyddiwyd hwy hefyd i gludo'r cyffuriau. Ar 16 Mawrth y llynedd, gwnaethant gludo pum cilogram o heroin i dde Cymru. Roedd tystiolaeth bellach yn dangos mai Jason a Heather Flannigan oedd yn gyfrifol am ddelio cyffuriau ‘stryd’ yn lleol yn Bolton a'r ardaloedd cyfagos.

Mae Asim Syed yn hanu o Enfield yn Llundain. Cludwr arian parod oedd ei rôl ef. Ar 11 Ionawr 2023, cafodd ei arestio ar ôl casglu bron £99,000 o arian parod gan Christopher Wray ym Merthyr Tudful.

Roedd tystiolaeth hefyd yn dangos bod Syed yn cael ei gyflogi gan grwpiau troseddau cyfundrefnol eraill ledled y DU yn cynnal casgliadau tebyg o arian parod. Amcangyfrifir bod Syed wedi bod yn gyfrifol am gasglu cyfanswm o filiynau o bunnoedd.

Dywedodd Ditectif Arolygydd Vinnie Easton o Uned Troseddau Cyfundrefnol Ranbarthol Tarian:

“Rydym yn croesawu'r dedfrydau a roddwyd i'r dynion a'r menywod am eu rolau yn smyglo ac yn gwerthu cyfanswm sylweddol iawn o gyffuriau Dosbarth A yn ne Cymru.

“Datgelodd yr ymchwiliad trylwyr hwn gynllun cyffuriau mawr ac mae'n enghraifft wych o'r gwaith manwl a gaiff ei gyflawni i fynd i'r afael â'r math hwn o drosedd gyfundrefnol.”

"Nid oes lle i gyffuriau anghyfreithlon yn ein cymdeithas, ac roedd y troseddwyr yn yr ymgyrch hon yn rhan o gang troseddau cyfundrefnol a achosodd niwed a thrallod yn ein cymunedau drwy gyflenwi cyffuriau.

“Rydym yn annog unrhyw un ledled de Cymru sydd â gwybodaeth am ddelio cyffuriau yn eu cymunedau i gysylltu â ni ar 101 neu ag elusen annibynnol Crimestoppers yn ddienw ar 0800 555 111.”

Ar 25 a 26 Medi, cafodd yr unigolion eu dedfrydu yn Llys y Goron Caerdydd. Rhoddwyd y dedfrydau canlynol:

Kerry Evans, 35 oed	14 mlynedd a 5 mis
Lloyd Jones, 30 oed	8 mlynedd a 10 mis
Ricky Griffiths, 39 oed	7 mlynedd a 1 mis
Alex Davies, 28 oed	7 mlynedd
Christopher Wray, 31 oed	7 mlynedd a 6 mis
David Halliwell, 40 oed	6 mlynedd a 7 mis
Heather Flannigan, 42 oed	4 mlynedd a 3 mis
Jason Flannigan, 47 oed	7 mlynedd a 8 mis
Leon Owen, 29 oed	7 mlynedd a 9 mis
Asim Syed, 45 oed	18 mis
Claire James, 37 oed	7 mlynedd a 10 mis